વલસાડઃ કૃષિ વિજ્ઞાન કેન્દ્ર અંભેટી ખાતે સ્વસહાય જૂથની મહિલાઓને પગભર કરવા માટે વિવિધ ખેતી અંગેના પ્રકરણો આપવામાં આવી રહ્યા છે. જેમાં ગત 5 વર્ષથી સતત 500થી વધુ ભાઈઓ-બહેનોને મશરૂમની ખેતી અંગેની તાલીમ આપવામાં આવી છે. આ તાલીમ પારડી અને કપરાડા તાલુકાના ગામોની મહિલાઓને પગભર બનાવવા માટે ખૂબ ઉપયોગી થઇ છે. જેથી ઓછા ખર્ચે વધુ ઉત્પાદન અને ઓછી મહેનતે વધુ આવક મેળવવા માટે વલસાડ જિલ્લાની મહિલાઓ મશરૂમની ખેતી તરફ વળી રહી છે.
પારડી તાલુકાના ધોધડકુવા ગામે 20થી વધુ મહિલાઓનું એક ગ્રુપ લોકડાઉનના સમયમાં મશરૂમનું ઉત્પાદન કરી તેનું વેચાણ કરી રહ્યું છે. મહિલાઓ આ મશરૂમમાં પ્રતિ કિલોએ રૂપિયા 500 જેટલી આવક મેળવી રહી છે.
ગૂજરાત વિદ્યાપીઠ સંચાલિત કૃષિ વિજ્ઞાન કેન્દ્ર ખાતે ખેડૂતો માટે ગત કેટલાક સમયથી વિવિધ પ્રશિક્ષણ અને તાલીમનું આયોજન કરવામાં આવે છે. જે પૈકી ગત 5 વર્ષમાં 500થી વધુ ખેડૂત ભાઈઓ-બહેનોને મશરૂમની તાલીમ આપવામાં આવી છે. જેથી અનેક મહિલાઓએ મશરૂમની ખેતી શરૂ કરી છે.
લોકડાઉનમાં પારડી અને કપરાડા તાલુકાના વિવિધ ગામોમાં અનેક મહિલાઓના જૂથને મશરૂમના સિલિન્ડર ભરવા અંગેનું પ્રશિક્ષણ અને લોકડાઉનના સમયમાં મશરૂમની ખેતી કરી ઓછા ખર્ચે વધુ ઉત્પાદન કેવી રીતે મેળવવું તે અંગેની પણ સંપૂર્ણ માહિતી અપાઈ છે. જેથી કરીને મહિલાઓ મશરૂમની ખેતી દ્વારા સારી આવક મેળવી શકે.
વલસાડ જિલ્લામાં ઓઇસ્ટર અને પિંક મશરૂમ નામના 2 પ્રકારના મશરૂમનું સરળતાથી ઉત્પાદન થઇ શકે છે. મશરૂમની ખેતીમાં 25માં દિવસે ઉત્પાદન શરૂ થઈ જતું હોય છે. આ સાથે જ સામાન્ય ઘરમાં જ તેનું ઉત્પાદન કરી શકાય છે.
ઉલ્લેખનીય છે કે, મશરૂમમાંથી ભરપૂર પ્રોટીન મળે છે. તે ડાયાબિટીસ, બ્લડપ્રેશર તેમજ અન્ય બિમારીઓ સામે ખૂબ સારૂં પરિણામ આપે છે. જેથી ડૉક્ટર્સ પણ અનેક દર્દીઓને પ્રોટીનના સ્ત્રોત તરીકે મશરૂમનો ખોરાક લેવાની સલાહ આપે છે. જેના કારણે માર્કેટમાં તેની ખૂબ મોટા પ્રમાણમાં માગ રહે છે.
