કપરાડામાં ભાજપના બાબુ વરઠાએ છેડો ફાડી કોગ્રેસમાં વાપસી કરી, રાજકારણ ગરમાયું

કપરાડા ભાજપના પીઢ નેતા બાબુ વરઠાએ ભાજપનો છેડો ફાડી કોંગ્રેસમાં જતાં રાજકારણ ગરમાયુ છે. વર્ષ 2014માં કોંગ્રેસ છોડીને ભાજપમાં આવેલ વારલી સમાજ પ્રમુખ બાબુભાઈ વરઠા આજે કપરાડા ખાતેના એક કાર્યક્રમ ફરીથી કોંગ્રેસમાં જોડાયા છે. કોંગ્રેસમાં આવવાથી હવે ભાજપ-કોંગ્રેસ વચ્ચે સીધો જંગ થશે એવું મનાય છે. કારણ કે કપરાડામાં બહુ મતો વારલી સમાજના છે અને તે ચૂંટણીમાં કોંગ્રેસને ફાયદો કરાવી શકે એમ છે.

• ભાજપના કદાવર કાર્યકર્તાએ ભાજપનો છેડો ફાડ્યો
• કોંગ્રેસમાં જોડાતા કપરાડામાં રાજકારણ ગરમાયું
• બાબુભાઈ વરઠા 2014માં ભાજપમાં જોડાયા
• પૂર્વ કેન્દ્રીય પ્રધાન તુષાર ચૉધરીની આગેવાનીમાં કોંગ્રેસનો ખેસ ધારણ કર્યો
• આગામી ધારાસભ્યની ચૂંટણીના સમીકરણો ચોક્કસ પણે બદલાશે

વલસાડ: ભાજપના કદાવર કાર્યકર્તા છેડો ફાડી કોંગ્રેસમાં જોડાતા કપરાડામાં રાજકારણ ગરમાયુ છે. એક સમયે કોંગ્રેસમાં જિલ્લા ઉપપ્રમુખ રહી ચૂકેલા બાબુભાઈ વરઠા જેઓ 2014માં ભાજપમાં જોડાયા હતા. તેઓ આજે ફરી કોંગ્રેસમાં પરત ફર્યા છે. આજે કપરાડામાં યોજાયેલા એક કાર્યક્રમમાં તેઓ પોતાના ટેકેદારો સાથે માજી કેન્દ્રીય પ્રધાન તુષાર ચૉધરીની આગેવાનીમાં કોંગ્રેસનો ખેસ ધારણ કર્યો હતો.

કપરાડાના ભાજપના અગ્રણી કાર્યકર બાબુ વરઠાએ ભાજપ થી છેડો ફાડયો

હવે આગામી ધારાસભ્યની ચૂંટણીના સમીકરણો ચોક્કસ પણે બદલાઈ જશે. કપરાડામાં 60 ટકા મતદારો વારલી સમાજના છે. જ્યારે 20 ટકા કુકણા સમાજ અને 20 ટકા અન્ય જાતિના છે. બાબુભાઈ વરઠા વારલી સમાજના પ્રમુખ સહકારી આગેવાન હોવાથી ચૂંટણીમાં વારલી સમાજના મતદાર તેમના ખોળે મતો આપે એ ચોક્કસ છે.

જ્યારે કોંગ્રેસ પક્ષમાં આવ્યા બાદ હવે કોંગ્રેસને પણ જીતુ ચૉધરી સામે ટક્કર આપે એવો સક્ષમ ઉમેદવાર મળી ચુક્યો હોય એમ જણાય છે. રાજકારણના જાણકારો એવું માની રહ્યાં છે કે, આગામી દિવસમાં કોંગ્રેસ ઉમેદવાર તરીકે બાબુ વરઠાના નામની જાહેરાત કરી દે તો એમાં કોઈ નવાઈ નહીં. આજે કપરાડા ખાતે યોજયેલા કાર્યક્રમમાં ડો. તુષાર ચૉધરીએ આઈસીસીના સભ્ય ગૌરાંગ પંડ્યા, માજી સાંસદ કિશન પટેલ સહિત અનેક કાર્યકરો ઉપસ્થિત રહ્યાં હતાં.

કપરાડામાં રાજકારણ ગરમાયુ

મહત્વનું છે કે, જો કોંગ્રેસ દ્વારા બાબુ વરઠાને ઉમેદવાર તરીકે જાહેર કરવામાં આવે તો કપરાડામાં ધારાસભ્યની ચૂંટણીમાં ભારે રસાકસી ભરી રેહશે.