ધરમપુરથી 20 કિલોમીટર દુર એવા અંતરિયાળ અને પહાડી વિસ્તારમાં આવેલા અભિનાથ મહાદેવ મંદિરે કેટલાક અસામાજિક તત્વો દ્વારા તોડફોડ કરી મહાદેવની પ્રતિમાને ખંડિત કરવામાં આવી હતી. આ ઘટનાના ઘેરા પ્રત્યાઘાતો આદિવાસી સમાજમાં પડ્યા છે વર્ષોથી વરસાદી દેવ તરીકે જાણીતા બનેલા આ મંદિરે વલસાડ જિલ્લાના છેવાડાના ઉમરગામથી લઇને છેક બીલીમોરા સુધીના લોકો અહીં પૂજા કરવા માટે આવે છે.
જેના કારણે આદિવાસી સમાજમાં આ મંદિર ખૂબ જ મહત્વ છે અને આ જ મંદિરે બનેલી ઘટનાને લઇને લોકોમાં ભારે રોષ જોવા મળ્યો છે. ગઈકાલે આ ઘટના બાદ લોકોએ એક બેઠક બોલાવી હતી અને આ બેઠકમાં રેલી યોજી મામલતદારને આવેદનપત્ર આપવાનું નક્કી કરવામાં આવ્યું હતું.
જેને અનુલક્ષીને આજે ધરમપુરના સમડી ચોક ખાતે 10થી વધુ ગામોના લોકો એકત્ર થયા હતા અને હર હર મહાદેવના નારા સાથે એક રેલી યોજી મામલતદાર કચેરી સુધી પહોંચી મામલતદારને આવેદનપત્ર આપી અસામાજિક તત્વો સામે કડકમાં કડક કાર્યવાહી કરવાની માગ કરી હતી. તેમજ જો દસ દિવસમાં કોઇ કાર્યવાહી નહીં થાય તો આદિવાસી સમાજ દ્વારા વધુ ઉગ્ર આંદોલન કરવામાં આવશે તેવી ચીમકી પણ ઉચ્ચારી હતી.
અત્રે ઉલ્લેખનીય છે કે, વલસાડ જિલ્લામાં ધરમપુર અને કપરાડાના અંતરિયાળ વિસ્તારમાં છેલ્લા કેટલાક સમયથી ડિસેમ્બર માસ આવતા જ કેટલાક તત્વો દ્વારા હિન્દુ મંદિરોમાં તોડફોડ કરીને શાંતિપૂર્ણ વાતાવરણને ડહોળવાનો પ્રયાસ કરવામાં આવે છે અને આ ઘટના બાદ કેટલાક અગ્રણીઓ પોતાના રાજકીય રોટલો શેકી લેતા હોય છે. આવી ઘટનાઓને પગલે ધરમપુર અને કપરાડા વિસ્તારની શાંતિ પણ તોડવાનો પ્રયાસ કરવામાં આવી રહ્યો છે.
