વિશ્વ વિખ્યાત મહારાજા સયાજીરાવ યુનિવર્સિટીના વિદ્યાર્થી સંઘની ચૂંટણી આગામી 10 ઓગષ્ટના રોજ યોજાવાની છે. જેથી કેમ્પસના રાજકારણમાં ગરમાવો આવ્યો છે, તો બીજી બાજૂ યુનિવર્સિટીના નાના ગ્રુપો પણ વિદ્યાર્થીઓ પર મજબુત પકડ ધરાવતા નેતાઓ વોટ બેન્કનું ગણિત માંડવા અને પોતાની તરફેણમાં સમીકરણ બેસાડવા માટે સક્રિય થઇ ગયા છે.
યુનિવર્સિટીમાં વિદ્યાર્થી યુનિયનના જીએસ, વીપી અને એફઆરની ચૂંટણી 10 ઓગસ્ટે યોજાશે. યુનિવર્સિટીના રિટર્નિંગ ઓફિસર દ્વારા ચૂંટણીનું જાહેરનામું બહાર પાડવામાં આવ્યું હતું. જોકે યુનિવર્સિટી સત્તાધીશોએ અચાનક જ ચૂંટણી જાહેર કરી દીધા બાદ હવે કેમ્પસમાં આગામી 10 ઓગષ્ટ સુધી શિક્ષણ કાર્યની જગ્યાએ પ્રચારનો ધમધમાટ વધારે જોવા મળશે.
યુનિવર્સિટીના વિદ્યાર્થી સંઘ એટલે કે, સ્ટુડન્ટ યુનિયનના નેજા હેઠળ યુનિવર્સિટીના જીએસ ,વીપી અને વિવિધ ફેકલ્ટીના એફઆરની ચૂંટણી દર વર્ષે યોજવામાં આવતી હોય છે. જેને લઈને જાહેરનામું પ્રસિદ્ધ કરવામાં આવ્યું છે. વિદ્યાર્થી સંઘની ચૂંટણી 10 ઓગષ્ટના રોજ યોજાશે અને 31 જુલાઈના રોજ ઉમેદવારી પત્રો ભરવાનો છેલ્લો દિવસ રહેશે. તે જ દિવસે ઉમેદવારી પત્રોની ચકાસણી પણ કરવામાં આવશે. 2 ઓગષ્ટના રોજ ઉમેદવારી પત્રો પરત ખેંચવાની છેલ્લી તારીખ છે. 10 ઓગષ્ટના રોજ સવારે 10થી બપોરે 2 વાગ્યા સુધી મતદાન કરવામાં આવશે અને તે જ દિવસે બપોરે 3 કલાકથી પેવેલિયન બિલ્ડીંગ ખાતે મતગણતરીની પ્રક્રિયા હાથ ધરવામાં આવશે. એમ.એસ.યુનિવર્સિટીમાં 14 ફેકલ્ટી અને 3 કોલેજોમાં ચૂંટણી યોજાશે. જેમાં અભ્યાસ કરી રહેલા અંદાજે 35 હજારથી વધુ વિદ્યાર્થીઓ મતદાન કરશે.
