સુરત જિલ્લામાં આદિવાસી વિસ્તાર ગણાતા મહુવા તાલુકામાં આદિવાસી ખેડૂતોની જીવાદોરી વિસ્તારના ચેકડેમો છે. મહુવા તાલુકાના વલવાળા , સામ્બા, વસરાઇ ગામે પાંચ જેટલા ચેક ડેમો આવ્યા છે. આ પાંચેય ચેક ડેમ હાલ બિસ્માર થયાં છે. ઉનાળાના સમયે જ ચેકડેમ લીકેજ થયાં હતાં. અનેક ફરિયાદો છતાં તંત્ર દ્વારા મરામતની કોઈ કામગીરી કરવામાં આવી ન હતી. ઉનાળાના સમયની કામગીરી ચોમાસાની સિઝનમાં પણ કરવામાં આવી ન હતી. જેને પગલે હાલમાં પડેલ વરસાદી પાણી પણ વહી જવાની નોબત આવી છે.
ઓલણ અને અંબિકા નદી પર આવેલ ચેક ડેમોથી વિસ્તારની હજારો હેક્ટર ખેતીની જમીન નિર્ભર રહે છે. ચેક ડેમના પાણીથી ખેડૂતો ખેતીના પાકને જીવનદાન આપે છે. પરંતુ મરામતના અભાવે આ પાણી સંગ્રહિત થતું નથી. લાખોના ખર્ચે બનેલ ચેક ડેમો મરામતના અભાવે માત્રને માત્ર પૈસા ન આંધણ સિવાય કશું થયું ન હોવાની પણ સ્થાનિકો દ્વારા બુમરેગ ઉઠવા પામી છે.
મહુવા તાલુકાના ચેક ડેમમાં લીકેજથી ગત વર્ષે ઉનાળાની સિઝનમાં ખેતી અને પશુપાલન માટે જળ સંકટ ઉભું થયું હતું. આ સિઝનમાં અંબિકા અને ઓલણ નદીમાં પુર આવ્યું હતું. ખેડૂતો પણ ખુશ હતા. પરંતુ મરામતની કામગીરી ન કરાતા હવે પાણી સંગ્રહિત થવાને બદલે વહી જઈ રહ્યું છે.
