સુરત: શહેરના સ્નેહલ પટેલનું જંગલ વેસુ વિસ્તારમાં કુલ 16 હજાર ચોરસ મીટરમાં ફેલાયેલું છે. ત્યાં તમામ પ્રાણીઓ-પક્ષીઓને પાણી મળી રહે એટલા માટે એક તળાવ પણ બનાવવામાં આવ્યું છે. એ તળાવમાં માછલીઓ અને કાચબાઓ પણ મુકવામાં આવ્યા છે. જો કે, હાલ શહેરીકરણને કારણે વન્યજીવન ખોરવાયું છે.
તેમણે બનાવેલા ફાર્મમાં અમુક પક્ષીઓનું આવન-જાવન બંધ થયું છે, તો એની સામે દુધરાજ (ઝાડના જીવાતોને ખાઈ પાકને બચાવનાર), હુપ્પુ (જમીન પરના જીવાતોને ખાઈ પાકને બચાવનાર), ચામાચીડિયા જેવા પક્ષીઓ તેમજ નોળિયો, જંગલી બિલાડી જેવા પ્રાણીઓનું પ્રમાણ વધ્યું છે. વળી ઘુવડ જેવા પક્ષીઓનું પ્રમાણ તાંત્રિક વિદ્યાની અંધશ્રદ્ધાને કારણે ઘટ્યું છે. જેને લઈને ઉંદરોનું પ્રમાણ વધ્યું છે. સાપનું પ્રમાણ પણ શહેરીકરણને કારણે ઘટી રહ્યું છે. આ જંગલમાં અંદાજે 40 જાતના પક્ષીઓ અને 30 જાતના પતંગિયાઓ જોવા મળે છે.
સીઝન પ્રમાણે એમના જંગલમાં પક્ષીઓ અને પતંગિયાઓ પણ બદલાય છે. એમને ત્યાં કિંગ ફિશર, કોરમોરન્ટ, જલ કુકડી પોપટ, શાહુડી અને ઘુવડ જેવા પક્ષીઓ જોવા મળે છે. એમના ખાવા માટે રાયણ, ફાલસા, ચોર આંબલો જેવા વૃક્ષો પણ ઉગાડયા છે. આ અંગે વધુમાં સ્નેહલ પટેલે જણાવ્યું હતું કે, બાળપણથી જ એમના માતા-પિતા દર વેકેશનમાં એમને જંગલ ટૂર કરાવતા હતા. પ્રકૃતિના ખોળે રહેવાથી તેઓ વિવિધ જાતના પક્ષીઓ અને વનસ્પતિઓ વિશે જાણતા હતા. તેમણે આ પછી ખેતર લઈને આ જંગલ વિકસાવ્યું.
તેઓ કહે છે કે, જો લોકો નાના પાયે વન્યજીવોની મદદ કરવા માંગતા હોય તો તેઓ એક તરફ આર્ટિફિશિયલ માળા બનાવીને મૂકે તો તેમાં ચકલી, પોપટ, મેના અને ઘુવડ જેવા પક્ષીઓ આવીને રહેશે. જેથી તેમની સંખ્યા વધશે અને બીજી તરફ તેમના જીવનનિર્વાહ માટે દેશી વૃક્ષો વાવે તો વન્યજીવનને વધારી શકાય એમ છે.
