સુરતના કડોદ અને માંડવીમાં બપોર પછી સ્વૈચ્છીક લોકડાઉન

સુરત જિલ્લાના માંડવી નગર અને બારડોલીના કડોદ ગામમાં વેપારીઓએ સ્વૈચ્છિક લોકડાઉનનો મંગળવારથી પ્રારંભ કર્યો હતો. બન્ને જગ્યાએ બપોર પછી વેપારીઓએ સ્વયંભૂ દુકાનો બંધ કરી દીધી હતી. કોરોનાના સંક્રમણને રોકવા માટે વેપારીઓએ આ નિર્ણય કર્યો હતો.

• માંડવી નગર અને કડોદ ગામમાં સ્વૈચ્છિક લોકડાઉન
• કોરોના સંક્રમણ વધતા કરાયો નિર્ણય
• વેપારીઓએ સ્વયંભૂ દુકાનો બંધ કરી

સુરતઃ જિલ્લાના માંડવી નગર અને બારડોલી તાલુકાના કડોદ ગામમાં વેપારીઓએ બપોર બાદ સ્વયંભૂ બંધ પાળ્યો હતો. કોરોના સંક્રમણને રોકવા માટે કડોદના વેપારીઓએ સરાહનીય કદમ ઉઠાવી આજથી મંગળવારથી આંશિક લોકડાઉનનો પ્રારંભ કરવામાં આવ્યો હતો. સ્થાનિક લોકોએ પણ વેપારીઓના આ નિર્ણયને વધાવી લીધો હતો. સુરત જિલ્લા સહિત બારડોલી તાલુકામાં કોરોના સંક્રમણ વધી રહ્યું છે. જેના કારણે હવે નાના શહેરોથી લઈ ગામડાઓ સ્વૈચ્છીક લોકડાઉન તરફ વળી રહ્યા છે.

આ પણ વાંચોઃ કોરોના સંક્રમણને રોકવા આણંદ જિલ્લાના 12 ગામોમાં સ્વૈચ્છિક લોકડાઉન

કડોદમાં બપોર પછી રસ્તા સુમસામ

બારડોલી તાલુકાના કડોદ ગામમાં ગત રોજ વેપારીઓની મિટિંગ યોજાઈ હતી, જેમાં નક્કી થયા મુજબ મંગળવારના રોજ બપોરે બે વાગ્યાથી બજાર સ્વયંભૂ બંધ કરવામાં આવી હતી. તમામ દુકાનો બંધ થતાં કડોદના રસ્તાઓ પણ સૂમસામ થઈ ગયા હતા અને લોકોએ કામ વગર બહાર નીકળવાનું પણ ટાળ્યું હતું. આ સ્વૈચ્છીક લોકડાઉનમાંથી આવશ્યક ચીજવસ્તુઓ અને દવાની દુકાનોને બાકાત રાખવામાં આવી છે.

આગામી 15 એપ્રિલ સુધી બંધનો થશે અમલ

બીજી તરફ સુરત જિલ્લાના માંડવી નગરમાં પણ વેપારીઓએ બપોર પછી સ્વૈચ્છીક દુકાનો બંધ કરી હતી. બપોરે ત્રણ વાગ્યા પછી નગરના રસ્તાઓ સૂમસામ થઈ ગયા હતા. માત્ર મેડિકલ સ્ટોર અને જીવન જરૂરી ચીજવસ્તુની દુકાનો સિવાય માંડવીનું બજાર સજ્જડ બંધ રહ્યું હતું. આગામી 15 એપ્રિલ સુધી આ બંધનો અમલ કરવામાં આવશે.

આ પણ વાંચોઃ મુન્દ્રાના સમાઘોઘા ગામમાં આંશિક લોકડાઉન

લોકોને કામ વગર બહાર ન નીકળવા કરાઈ અપીલ

વેપારીઓ દ્વારા લોકોને કારણ વગર બહાર ન નીકળવાની સલાહ આપવામાં આવી છે. બજાર ખુલ્લુ હોય તે સમયે બજારમાં વેપારીઓ તેમજ ગ્રાહકોએ માસ્ક પહેરવું, સોશિયલ ડિસ્ટન્સિંગનું પાલન કરવું અને કોવિડ 19ની ગાઈડલાઇનનું પાલન કરવાની સલાહ આપવામાં આવી હતી.