- સુરતમાં સિવિલમાં 44 પૉઝિટિવ મહિલાઓની ડિલિવરી કરવામાં આવી
- માતા અને બાળકો સ્વસ્થ્ય છે
- બાળકને ડેરીમાં મળતુ પાશ્યુરાઇઝ દૂધ આપી શકાય
સુરત: દુનિયા સૌથી પવિત્ર સંબંધ માતા અને બાળક વચ્ચેનો માનવામાં આવે છે. આમ તો માતાને યાદ કરવાનો કોઈ એક ખાસ દિવસની જરૂર નથી પરંતુ, વિશ્વભરની માતાઓની યાદમાં એક ખાસ દિવસ રાખવામાં આવ્યો છે. દર વર્ષે મે મહિનાના બીજા રવિવારે મધર્સ ડે ઉજવણી કરવામાં આવે છે. તા.9મી મે એટલે સમગ્ર વિશ્વમાં માતૃદિન એટલે કે મધર્સ ડે તરીકે ઉજવાય છે.
કોઇ પણ નવજાત નથી આવ્યું કોરોના પૉઝિટિવ
સુરતની નવી સિવિલ હોસ્પિટલના પ્રસૃતિ વિભાગના એ.ડી.પ્રૉફેસર ડો.અંજની શ્રીવાસ્તવે જણાવ્યું કે, "કોરોનાની બીજી લહેરમાં માર્ચ અને એપ્રિલ મહિના અને હાલ સુધીમાં 600 જેટલી સગર્ભા મહિલાઓની ડિલિવરી કરી સરાહનીય કામગીરી કરી છે. જે પૈકી 44 પૉઝિટિવ મહિલાઓની ડિલિવરી કરવામાં આવી હતી. જન્મ થયેલા બાળકો પૈકી કોઈ બાળક પૉઝિટિવ આવ્યું નથી પરંતુ ખાનગી હોસ્પિટલમાંથી 3 જેટલા માતા અને બાળક પૉઝિટિવ આવ્યા બાદ સિવિલમાં સારવાર માટે દાખલ થયા હતા. જે પૈકી બે બાળકો સ્વસ્થ થયા છે. જ્યારે એક બાળક ખેંચ, મગજનો સોજો જેવી જન્મજાત બિમારીના કારણે મૃત્યુ થયુ હતું."
વધુ વાંચો: “માઁ”થી પણ સુંદર “માઁ”નો પ્રેમ- થેલેસેમિયાગ્રસ્ત કિંજલબહેન અનેક માટે બન્યા પ્રેરણાનું પ્રતીક
716 સગર્ભા મહિલાઓની ડિલિવરી કરવામાં આવી
સ્મિમેર હોસ્પિટલમાં માર્ચ - એપ્રિલ મહિના દરમિયાન 716 સગર્ભા મહિલાઓની ડિલિવરી કરવામાં આવી હતી. જેમાં 16 કોવિડ પોઝિટિવ સગર્ભા મહિલાઓ પૈકી 12ની સફળ ડિલિવરી કરવામાં આવી હતી. જો કે તેમાંથી કોઈ બાળક પૉઝિટિવ આવ્યું નથી. તેમ સ્મિમેરના ડૉ.અશ્વિન વાછાણીએ જણાવ્યું હતું.
વધુ વાંચો: MothersDay: નવા જમાનાની 'મા' એ બદલ્યુંં હિન્દી સિનામાનું રૂપરંગ
બાળકને ડેરીમાં મળતુ પાશ્યુરાઇઝ દૂધ આપી શકાય
વધુ વિગતો આપતા સિવિલમાં બાળરોગ વિભાગના હેડ વિજયભાઈ શાહ જણાવ્યું હતું કે, "જ્યારે માતા પોઝિટિવ હોય અને બાળક નેગેટિવ હોય તેવા સમયે માતા પોતાનું ધાવણ બાળકને આપી શકે છે. માતાના ધાવણથી બાળકને કોરોનાનું જોખમ નહિવત્ છે પરંતુ આ માટે ખાસ તકેદારી રાખવી જોઈએ. માતાએ સ્તનપાન કરાવતી વખતે હાથ સાબુથી ધોઈ, સેનિટાઈઝ કરી મોઢા અને નાક પર માસ્ક બાધવું જોઈએ. માતાનું ધાવણ બાળક માટે અમૃત સમાન છે અને બાળકને ઘણા રોગોથી બચાવે છે. જો માતા ઑક્સિજન પર હોય તો માતાનું ધાવણ કાઢીને ચમચી અને વાટકીમાં લઈ બાળકને દૂધ આપી શકાય અથવા અન્ય માતાનું ધાવણ પણ આપી શકાય. ચમચી અને વાટકીને ઉકળતા પાણીમાં 10 મિનીટ સુધી રાખ્યા બાદ જ ઉપયોગમાં લેવા જોઈએ. આવા સંજોગોમાં ડોકટરની સલાહ અનુસાર બાળકને ડેરીમાં મળતુ પાશ્યુરાઇઝ દૂધ આપી શકાય છે."
