સુરતમાં યુવક-યુવતી સહિત 52 નબીરાઓ નશાની હાલતમાં ઝડપાયા, ફાર્મ હાઉસમાં ચાલતી હતી મહેફીલ

29 ફેબ્રુઆરી લીપ યરની પાર્ટીમાં સુરત પોલીસ જઈ ચઢી હતી. ડુમસમાં આવેલા આર્શીવાદ ફાર્મ હાઉસમાં દારૂની મહેફીલ ચાલી રહી હોવાની બાતમી પોલીસને મળી હતી. પોલીસે છાપો મારી 52 લોકોને નશાની હાલતમાં ઝડપી પાડ્યા હતાં. જે પૈકી 13 યુવતીઓ પણ હતી. પોલીસે લાખો રૂપિયાનો મુદ્દામાલ કબ્જે કરી કાયદેસરની કાર્યવાહી હાથ ધરી છે.

સુરત: ગુજરાતમાં ભલે દારૂબંધીના કડક દાવા કરવામાં આવતા હોય પરંતુ સતત દારૂની મહેફિલો માણવામાં આવી રહી છે. કચ્છ બાદ હવે સુરતના ડુમસ રોડ પર આવેલ ફાર્મ હાઉસમાં ચાલતી લિપ યર પાર્ટી પર પોલીસે છાપો મારી રંગમાં ભંગ પાડ્યો છે. ફાર્મ હાઉસ પરથી પોલીસે દારૂની મહેફિલ માણતા 52 શંકમંદ લોકોને ઝડપી પાડી નવી સિવિલ હોસ્પિટલ ખાતે મેડિકલ તપાસ કરાવવામાં આવી હતી. લિપ યર પાર્ટીમાં દારૂની મહેફિલ માણતા ઝડપાયેલા બાવન પૈકી તેર જેટલી મહિલાઓ સહિત યુવતીઓ પણ ઝડપાઇ હતી. દારૂ પાર્ટી દરમ્યાન પોલીસે ફાર્મ હાઉસ પરથી સાત હજારથી વધુનો વિદેશી દારૂનો જથ્થો તેમજ તેર જેટલી ફોર વ્હીલ કાર જપ્ત કરી વધુ તપાસ હાથ ધરી હતી.

રાજ્ય સરકારની દારૂબંધીના કડક દાવા ફરી એક વખત પોકળ સાબિત થયા છે. સુરતના ડુમસ રોડ પર આવેલા આશીર્વાદ ફાર્મ હાઉસમાં લિપ યર પાર્ટીની અંદર ચાલી રહેલી દારૂની મહેફિલને ડુમસ પોલીસે ઝડપી પાડી છે. આશીર્વાદ ફાર્મ પર 29 ફેબ્રુઆરીની લિપ યર પાર્ટીનું નબીરાઓ દ્વારા આયોજન કરવામાં આવ્યું હતું. જેમાં કેટલીક યુવતીઓને પણ આમંત્રિત કરાઈ હતી. ફાર્મ હાઉસ પર એક તરફ દારૂની મહેફિલ ચાલી રહી હતી. ત્યાં બીજી તરફ ડુમસ પોલીસે અહીં છાપો મારી રંગમાં ભંગ પાડયો હતો. લિપ યર પાર્ટી દરમ્યાન તમામ લોકો દારૂના નશામાં મળી આવ્યા હતા. પોલીસે બ્રેથ એનેલાઈઝર મશીન દ્વારા તપાસ કરતાં તમામ લોકો દારૂના નશામાં હોવાનું બહાર આવ્યું હતું. ફાર્મ હાઉસ પરથી પોલીસને ત્રણ પેટી બિયર તેમજ વોડકાની બોટલો મળી આવી હતી. આ દારૂનો જથ્થો પોલીસ દ્વારા જપ્ત કરવામાં આવ્યો હતો. આ ઉપરાંત પોલીસે 13 ફોર વ્હીલ કાર કબ્જે કરી તમામને મેડિકલ તપાસ માટે સુરત નવી સિવિલ હોસ્પિટલ ખસેડયા હતા. જો કે મહિલા હોવાનો લાભ આપી યુવતીઓને મેડિકલ તપાસ બાદ નોટિસ આપી મુક્ત કરવામાં આવી હતી.ડુમસના આશીર્વાદ ફાર્મ પર પોલીસે છાપો મારી સૌથી મોટી દારૂની મહેફિલ ઝડપી પાડી હતી. લિપ યર પાર્ટી દરમ્યાન દારૂના નશામાં છાકટા બનેલા તમામ 39 જેટલા નબીરાઓ ને પણ સુરત નવી સિવિલ હોસ્પિટલ મેડિકલ તપાસ માટે લાવવામાં આવ્યા હતા.જે તમામ નબીરા મોટા પરિવારોથી હોવાનું જાણવા મળે છે. બીજી તરફ લિપ યર પાર્ટીમાં લાવવામાં આવેલ દારૂનો જથ્થો કોના દ્વારા પોહવાડવામાં આવ્યો તે એક મોટો સવાલ અહીં ઉપસ્થિત થઈ રહ્યો છે.એટલું જ નહીં પરંતુ ડુમસ રોડ પર આવેલ ફાર્મ હાઉસમાં ચાલતી દારૂની ની પાર્ટી અંગે ફાર્મ હાઉસના માલિક ને જાણ હતી કે કેમ તેવા સળગતા સવાલ ઉભા થઇ રહ્યા છે.ત્યારે હાલ તો ડુમસ પોલીસે તમામ સામે દારૂની મહેફિલ નો ગુનો નોંધી વધુ તપાસ હાથ ધરી છે.