સુરતમાં ડાયમંડ કટીંગ એન્ડ પોલિશિંગ ઉદ્યોગ વિશ્વમાં વિખ્યાત છે. 10માંથી 8 હીરાને ચમક આપનાર સુરતના રત્નકલાકારો મંદીના ભોગ બની રહ્યા છે. હીરા ઉદ્યોગમાં મંદીના કારણે હજારો ડાયમંડ રત્નકલાકારોને છૂટા કરવામાં આવ્યા છે. હવે તેમની આર્થિક મદદ માટે યુનાઇટેડ સ્ટેટ્સના જેમ્સ એન્ડ જ્વેલરી એસોસિએશન સામે આવ્યું છે.
અમેરિકાના જેમ્સ એન્ડ જ્વેલરી એસોસિએશનના સભ્યો સુરતના રત્નકલાકારો માટે પ્રથમ તબક્કામાં 50 લાખની આર્થિક સહાય કરશે. રત્નકલાકારોની દયનીય હાલત જોઈ સુરતના 6 ડાયમંડના વેપારીઓ દ્વારા રત્નકલાકાર સહાય ગ્રૂપ વોટ્સએપ પર શરૂ કરવામાં આવ્યુ છે. જેમાં અમેરિકા જેમ્સ એન્ડ જ્વેલરી એસોસિએશનના સભ્યો પણ જોડાયા છે. આ ગ્રુપના સભ્યો રત્નકલાકારોના પરિવારની મદદ કરે છે. તેમની મદદ માટેની જવાબદારી સુરતના આ 6 સભ્યોને આપી છે. ત્યારબાદ આ લોકોએ ટીમ બનાવી રત્નકલાકારો અને તેમના પરિવારની સર્વે કામગીરી હાથ ધરી છે. જેથી તેઓને યોગ્ય સહાય મળી રહે.
સુરતમાં વરાછા, કતારગામ, કાપોદરા, પુનાગામ વિસ્તારમાં રહેતા રત્નકલાકારો અને તેમના પરિવારની મુલાકાત લીધી હતી. જેમાં નોકરી ગુમાવનારા રત્નકલાકારોની ઓળખ માટે યુથ પાવર ગ્રૂપ અને ગોપીનાથ ગૌશાળા ગ્રૂપના સભ્યો જોડાયા છે. આ તમામ લોકો રત્નકલાકારો અને તેમના પરિવારની સ્થિતિને લઈ સર્વે કરી રહ્યા છે. જેની વિગત અમેરિકાના જેમ્સ એન્ડ જ્વેલરી એસોસિએશનના સભ્યોને આપવામાં આવશે ત્યારબાદ આ જરૂરિયાતમંદ રત્નકલાકારોના અને તેમના પરિવારની મદદ કરવામાં આવશે. હાલ પ્રાથમિકતા આત્મહત્યા કરનાર અને છુટા કરાયેલાં આવેલા રત્નકલાકારોના પરિવારને કરવામાં આવી રહી છે. મેડિકલ ખર્ચ, ઘર ભાડું, બાળકોની શાળા ફી, રાશનનો ખર્ચ જેવી સહાય આ સર્વેની કામગીરીના આધારે કરવામાં આવશે.
ઉલ્લેખની છે કે, વર્ષ 2008માં આવી જ રીતે સુરત હીરા ઉદ્યોગમાં ભારે મંદીના કારણે રત્નકલાકારોની સ્થિતિ સર્જાઈ હતી. આજે પણ આવી સ્થિતિના કારણે રત્નકલાકારોને છૂટા કરાયાં છે. ત્યારે સરકાર દ્વારા કોઈ મદદ કરવામાં આવી નથી. ત્યારે દેશની બહાર અમેરિકાથી વેપારીઓ મદદ માટે હાથ લંબાવી રહ્યા છે. જે ભારત સરકાર માટે શરમજનક છે.
