કર્ણાટકના વિજયવાડા ખાતે રહેતો વેપારી આ ગેંગનો ભોગ બન્યો છે. આરોપીઓએ કર્ણાટકના વેંકટાસત્યનારાયણ કોટેશ્વર ધર્માંરાવ નામના વેપારીને ઈન્ડિયા માર્ટ વેબસાઈટ દ્વારા સસ્તું સોનું આપવાની લાલચ આપીને કર્ણાટકથી સુરતના અડાજણ ખાતે આવેલી હોટેલમાં બોલાવ્યો હતો. ત્યારે આરોપીઓએ સસ્તા સોનાના બદલે પીળી ધાતુવાળી 100 ગ્રામ સોનાની બિસ્કિટ આપીને 27 લાખ જેટલી રકમ પડાવી લીધી હતી. આ અંગેની ફરિયાદ વેપારીએ રાંદેર પોલીસ મથકમાં નોંધાવી હતી.
આ ગુનાની તપાસ સ્થાનિક પોલીસની સાથે સુરત ક્રાઈમ બ્રાન્ચ પણ કરી રહી હતી. આ દરમિયાન મળેલી માહિતીના આધારે ક્રાઈમ બ્રાન્ચે ડુમસ રોડ પરથી શંકાસ્પદ આરોપીઓને ઝડપી પાડ્યા હતા. આ આરોપીઓની તપાસ કરાતા તેમની પાસેથી 9 લાખથી વધુ મુદ્દામાલ જપ્ત કરીને વધુ પૂછપરછ હાથ ધરી હતી. આ આરોપીઓમાંથી 2 આરોપીઓ સુરતના હોવાનું બહાર આવ્યું છે. જેમાં પરેશ ડોબરીયા કોસાદ અમરોલીનો તેમજ સરહુદ્દીન હમીદખાન રામપુરાનો રહેવાસી છે. જ્યારે અન્ય આરોપીઓ કર્ણાટક, આણંદ, મહારાષ્ટ્ર, ઉત્તરપ્રદેશ, રાજસ્થાન તેમજ દિલ્હીના રહેવાસી છે. આ આરોપીઓ આંતરરાજ્ય ગેંગ હોવાનું પોલીસ તપાસમાં જાણવા મળ્યું છે. સાથે જ આ આરોપીઓ ખેતીવાડી, દુકાન અને ચાની લારીના વ્યવસાય સાથે સંકળાયેલા છે.
સુરત ક્રાઈમ બ્રાન્ચની તપાસમાં જાણવા મળ્યું છે કે, આરોપી સલીમ અબ્દુલ અંસારી વિરૂદ્ધ મહેમદાબાદના તાલાલા અને નડિયાદ તેમજ આરોપી નજીર હુસૈન મલેક સામે તાલાલાના પોલીસ મથકમાં ગુનો નોંધાઈ ચુક્યો છે. આ આરોપીઓ ઈન્ડિયા માર્ટ ઓનલાઈન ટ્રેડિંગ સાઈટ પર રજિસ્ટર થયેલા વેપારીઓના નંબર મેળવીને તેઓને મોટા ડિસ્કાઉન્ટની લાલચ આપીને વેપારીઓને સુરત, અઠવા, મુંબઈ બોલાવવામાં આવતા હતા. ત્યારબાદ તેમનો પરિચય કેસ મેનેજર ગોલ્ડ એક્સપર્ટ તરીકે આપીને તેમને વિશ્વાસમાં લેતા હતા.
સાથે જ પોતે મોટા વેપારીઓ હોવાનું પણ જણાવતા હતા. જેમાં 1 કિગ્રા સોના પર 3 લાખ સુધીનું ડિસ્કાઉન્ટ આપવાની લાલચ આપવામાં આવતી હતી. ત્યારબાદ સોનું ખરીદવા આવેલા વેપારીને સેમ્પલ તરીકે 100 ગ્રામ સોનાનું બિસ્કિટ આપીને ચકાસણી કરવા એક્સપર્ટને મોકલતા હતા. જેથી વેપારીઓને ભરોસો આવી જાય અને તેઓ પાસેથી લાખોની કરમ પડાવીને ફરાર થઈ જતા. હાલ આ તમામ આરોપીઓની સુરત ક્રાઈમ બ્રાન્ચે ધરપકડ કરીને રિમાન્ડ માટેની તજવીજ હાથ ધરી છે. જ્યાં પોલીસ રિમાન્ડ દરમિયાન આરોપીઓ પાસેથી અન્ય ગુના ઉકેલવાની પણ શક્યતા રહેલી છે.
