Ganesh visarjan: ગણેશ વિસર્જનના અંતિમ દિવસે શ્રીજીને અપાઈ વિદાય

અનંત ચૌદશના દિવસે ગણેશ મહોત્સવ અને ઈદ એ મિલાદ પર્વ એક જ દિવસે હતા. બંને સમાજે કોમી એકતાના ભાઈચારા સાથે બંને પર્વની ઉજવણી કરી હતી. હિન્દુ સમાજે ગણેશ મહોત્સવના અંતિમ દિવસે ગણેશ પ્રતિમાનું ભાવભીનું વિસર્જન કર્યું હતું. મુસ્લિમ સમાજે પણ તેમના ઈદ એ મિલાદ પર્વની ઉજવણી કરી હતી. આ પ્રસંગે પોલીસ દ્વારા ચુસ્ત બંદોબસ્ત ગોઠવવામાં આવ્યો હતો.

વાપી: સમગ્ર વલસાડ જિલ્લામાં અને સંઘપ્રદેશ દાદરા નગર હવેલી, દમણમાં ગણેશ મહોત્સવના અંતિમ દિને બાપ્પાને ભાવભીની વિદાય આપી હતી. ગણપતિ વિસર્જનના અંતિમ દિવસે ગણેશ પંડાલ, સોસાયટીઓમાં સ્થાપિત ગણેશ પ્રતિમાની વિવિધ સાજ શણગાર સાથે શહેરના મુખ્ય માર્ગો પર શોભાયાત્રા નિકળી હતી. ગણપતિ બાપા મોરિયા પૂંઢચ્યા વર્ષી લવકર્યા, એક દો તીન ચાર ગણપતિનો જય જય કાર, જેવા ગગનભેદી નારા તેમજ ડીજેના તાલે નીકળેલી શોભાયાત્રા બાદ દમણગંગા નદી, કોલક નદી, અંબિકા નદી, નારગોલ, તિથલના દરિયા કિનારે, દમણના દરિયા કિનારે અને સેલવાસમાં દમણગંગા રિવરફ્રન્ટ પર બાપ્પાની પ્રતિમાનું વિસર્જન કરાયું હતું.

લોકોમાં આકર્ષણ: શહેરના તમામ મુખ્ય માર્ગો પર માનવ મહેરામણ ઉમટયો હતો. રેલીમાં આદિવાસી નૃત્ય, રાસ ગરબા, મરાઠી નૃત્ય, સમાજ જાગૃતિના બેનરોએ લોકોમાં આકર્ષણ ઉભુ કર્યુ હતુ. વાપીમાં વિસર્જનયાત્રાનું દમણગંગા નદી ખાતે, દમણમાં દરિયા કિનારે સમાપન થયું હતું. વિસર્જન સ્થળે અને વિસર્જન યાત્રામાં ચાંપતા પોલીસ બંદોબસ્ત વચ્ચે એક ફૂટની મૂર્તિ થી લઇ 15 ફૂટની 600 જેટલી મૂર્તિઓનું વિસર્જન કરાયું હતુ.

મુસ્લિમ સમાજમાં પણ હરખની હેલી: આજના દિવસે જ મુસ્લિમ સમાજનો ઈદ એ મિલાદ તહેવાર હતો. જે પર્વને લઈને મુસ્લિમ સમાજમાં પણ હરખની હેલી જોવા મળી હતી. વાપીમાં અગાઉ જિલ્લા પોલીસ વડા સાથે સમાજના આગેવાનોની શાંતિ સમિતિની બેઠકમાં ગણેશ વિસર્જનના દિવસે જ ઝુલુસ કાઢવાનું નક્કી કર્યું હતું. જે મુજબ સવારના 8 વાગ્યાથી બપોરના 12 વાગ્યા સુધી વાપી-ઉમરગામના વિવિધ વિસ્તારના મુખ્ય માર્ગ પર 15 જેટલા ઝુલુસ આયોજકો દ્વારા ઝુલુસ કાઢવામાં આવ્યું હતું.

પાણીમાં વિસર્જિત: ઉલ્લેખનીય છે કે,ગણેશજીની વિસર્જન યાત્રા અને મુસ્લિમ સમાજના ઝુલુસ દરમિયાન શહેરના મોટાભાગના માર્ગ પર ટ્રાફિક સમસ્યાને ધ્યાને રાખી કેટલાક રૂટ ડાયવર્ટ કર્યા હતા. ગણેશ પ્રતિમા નું વિસર્જન દરમિયાન નદી કે દરિયા કિનારે કોઈ અનિચ્છનીય ઘટના ના બને તે માટે ચાંપતા પોલીસ બંદોબસ્ત અને ફાયરની ટીમ ખડેપગે રહી હતી. પાણીના પ્રવાહમાં પણ દરેક પ્રતિમાનું ફાયરના જવાનો દ્વારા જ વિસર્જન કરવામાં આવ્યું હતું. જેમાં મોટી પ્રતિમાને ક્રેનની મદદથી પાણીમાં વિસર્જિત કરવામાં આવી હતી.