સુરત: શહેરમાં સતત વધી રહેલા કોરોના પોઝિટિવ કેસ અને વારંવાર સુરત સિવિલ હોસ્પિટલમાં બેદરકારી અને અવ્યવસ્થાની ફરિયાદ વચ્ચે સુરતના કોવિડ હોસ્પિટલમાં CCTV કેમેરા લગાડવામાં આવ્યા છે. આ 30 જેટલા કેમેરાથી હોસ્પિટલમાં થનાર સારવાર અને તમામ વ્યવસ્થા ઉપર નજર રાખવામાં આવશે.
કોવિડની સારવાર મેળવી રહેલા દર્દીઓ અનેક વાર અવ્યવસ્થા અંગે ફરિયાદ કરી ચુક્યા છે. ક્યારેક બિલાડી તો ક્યારેક કૂતરા કોવિડ વોર્ડમાં જોવા મળ્યાં છે. આ સાથે સુરતની કોવિડ હોસ્પિટલમાં યોગ્ય સારવાર ન મળવાની અનેક ફરિયાદો સામે આવી હતી. જેમાં ક્રિટિકલ, સેમી ક્રિટિકલ, આઈસીયૂ સહિતના વિભાગોમાં કેમેરા લગાડવામાં આવ્યા છે.
- સુરત કોવિડ હોસ્પિટલમાં CCTVથી રખાશે બાજ નજર
- કેમેરા મુખ્યપ્રધાનની ઓફિસ સાથે કનેક્ટ
- 24 કલાકની અંદર 220 કેસ કોરોના પોઝિટિવ
- જિલ્લામાં કુલ મૃત્યુઆંક 206 સુરત કોવિડ હોસ્પિટલમાં CCTV કેમેરા લગાવાયા
સૌથી અગત્યની વાત એ છે કે, કોવિડ હોસ્પિટલમાં લગાડવામાં આવેલા કેમેરા આ કેમેરાને મુખ્યપ્રધાનની કાર્યાલય સાથે પણ કનેક્ટ કરવામાં આવશે. જેથી CMO કાર્યાલય સુરત કોવિડ હોસ્પિટલની સમગ્ર કાર્યવાહી ઉપર બાજ નજર રાખી શકે.
સુરત સહિત જિલ્લામાં 24 કલાકની અંદર 220 કેસ કોરોના પોઝિટિવ નોંધાયા છે. સુરતમાં 180 અને જિલ્લામાં 40 કેસ પોઝિટિવ નોંધાયા છે. જેમાં કુલ કેસની સંખ્યા 5480 પર પહોંચી છે. એક જ દિવસમાં સુરત સહિત જિલ્લામાં કુલ 12 દર્દીઓના મોત થયા છે.
સુરત સહિત જિલ્લામાં કુલ મૃત્યુઆંક 206 છે. જ્યારે સુરત સહિત જિલ્લામાં 24 કલાકમાં 144 દર્દીઓને ડિસ્ચાર્જ કર્યા છે. સુરત શહેર અને જિલ્લામાં ડિસ્ચાર્જ દર્દીઓની સંખ્યા 3389 છે.
