સુરત: દર વર્ષે સુરતની વિવિધ રહેણાંક સોસાયટીઓમાં સાર્વજનિક ગણેસોત્સવનું ધામધુમ પૂર્વક આયોજન કરવામાં આવે છે, પરંતુ આ વર્ષે સુરતમાં કોરોનાનો કહેર હોવાથી સાર્વજનિક ઉત્સવની ઉજવણી પર પ્રતિબંધ મુકાયો છે. જેના કારણે આ વર્ષે સંખ્યાબંધ સોસાયટીઓમાં સાર્વજનિક ગણેશોત્સના બદલે લોકોએ ઘરે જ શ્રીજીની સ્થાપના કરી છે. ત્યારે રાંદેરના વાંકલ વિસ્તારના સેલર પરિવાર દ્વારા ગણેશજીની 21 મૂર્તિઓ સાચવવામાં આવી છે.
આ મૂર્તિઓ એક રૂપિયાના સિક્કા જેટલી જ છે એટલે કે એક થી દોઢ ઈંચ જેટલી છે. તો વળી તે અલગ અલગ રૂપની છે. આ મૂર્તિઓ બ્રાસની બની છે, આ અનોખી મૂર્તિઓ માત્ર ગણેશોત્સવ દરમિયાન જ પૂજાય છે તેવું નથી, પરંતુ આ મૂર્તિને મહોલ્લાના મંદિરમાં મૂકવામાં આવી છે જેથી ગણેશજીની પૂજા રોજ થાય છે.
મૂર્તિમાંથી એક મૂર્તિમાં સ્વેતાર્ક ગણપતિ છે જે આંકડાના ફૂલમાં હોય છે. એક વામનરૂપી ગણેશ છે તો અન્ય એક લંબોદર રૂપના શેષનાગના આસન પર બેઠેલા ગણપતિ છે. આ સિવાય નૃત્ય કરતા ગણેશજીની એટલે કે નટરાજાન ગણેશજીની પણ મૂર્તિ છે, અન્ય એક ગણપતિજી છે જેમના 10 થી વધુ હાથ છે અને બીજા બાલકૃષ્ણ સ્વરૂપના ગણપતિ છે.
