રાજકોટઃ મુખ્ય જળસ્રોતની વાત કરવામાં આવે તો રાજકોટના આજીડેમ અને ત્યારબાદ ન્યારી ડેમમાંથી દૈનિક પાણી શહેરમાં વિતરણ કરવામાં આવે છે, જ્યારે રાજકોટને વધુ પાણીની જરૂર પડે તો ભાદરમાંથી પાણી લેવામાં આવતું હોય છે. પરંતુ આ જળાશયોમાં જ્યારે પાણી ઉનાળા દરમિયાન ખૂટી જય છે, ત્યારે સૌની યોજના મારફતે નર્મદાનું પાણી આ જળાશયોમાં ઠાલવવામાં આવે છે અને રાજકોટવાસીઓ દૈનિક પાણીનો જથ્થો ઉપલબ્ધ કરાવવામાં આવે છે.
આ અંગે ઇટીવી ભારત દ્વારા રાજકોટમાં મેયર બિનાબેન આચાર્ય સાથે વાતચીત કરતા તેમને જણાવ્યું કે ચાલુ વર્ષે વરસાદ સારો થયો હોવાના કારણે રાજકોટના જળાશયોમાં પાણીનો પૂરતો જથ્થો ઉપલબ્ધ હતો, પરંતુ ઉનાળા દરમિયાન એકાએક પાણીની જરૂરિયાત વધતી હોય છે. જે માટે મનપા દ્વારા રાજ્ય સરકારને પત્ર લખીને સૌની યોજનાનું પાણી માંગવામાં આવ્યું હતું. આ વર્ષે ઉનાળામાં માત્ર એક જ વાર સૌની યોજનાનું પાણી રાજકોટ મનપા દ્વારા લેવામાં આવ્યું છે. જ્યારે રાજકોટવાસીઓને દરરોજ 20 મિનિટ સુધી પાણી આપવામાં આવે છે. તેમજ જ્યાં હાલ પાણીની પહોંચવાની વ્યવસ્થા નથી, ત્યાં ટેન્કર મારફતે લોકોને પાણી ઉપલબ્ધ કરાવવામાં આવી રહ્યું છે.
રાજકોટમાં મે મહિનાની વાત કરવામાં આવે તો રાજકોટના આજીડેમમાં 1માં 17.26 ફૂટ જેટલું પાણી હતું. જ્યારે ન્યારીમાં 15.74 ફૂટ જેટલું પાણી હતું, જેને લઈને આ બન્ને મુખ્ય જળાશયોમાં સૌની યોજના મારફતે પાણી ઠાલવવામાં આવ્યું, જેમાં આજીડેમને 26 ફૂટ અને ન્યારીને 18 ફૂટ જેટલા ભરવામાં આવ્યા હતા. તેમજ આ બન્ને જળાશયોમાંથી રાજકોટને પાણી પૂરું પાડવામાં આવતું હતું. જેને લઈને જ્યારે ઉનાળા દરમિયાન રાજકોટના મુખ્ય જળાશયોમાં પાણીનો જથ્થો ખૂટે ત્યારે મનપા દ્વારા રાજ્ય સરકાર પાસે સૌની યોજનાનું પાણી મંગવામાં આવે છે. જેને લઈને કહી શકાય છે કે સૌની યોજના થકી રાજકોટવાસીઓ કાયમી પાણીની સમસ્યાનો ઉકેલ આવી શક્યો છે.
