રાજકોટ જિલ્લાના કોટડાસાંગાણી તાલુકાના રામોદ ગામ ખાતે સુભાષ પાલેકર પ્રાકૃતિક ખેતી કરતા ખેડૂતોના જાત અનુભવ અંગે યોજાયેલી સંવાદ શિબિરમાં ગુજરાત રાજ્યના રાજ્યપાલ આચાર્ય દેવવ્રત તથા ભારત સરકારના કૃષિ રાજયપ્રધાન પુરૂષોત્તમ રૂપાલાએ હાજરી આપી હતી.
આ સંવાદ શિબિરમાં રાજ્યપાલ આચાર્ય દેવવ્રતે જણાવ્યું હતું કે, ગુજરાત વિશે જોયું અને જાણ્યું હતું. તેના કરતા પણ વધારે સુંદર છે. ગુજરાતના ખેડૂતને જળ સંચય દ્વારા પાણી મળતા તે સમગ્ર વિશ્વમાં પોતાનું કૌવત બતાવી રહ્યો છે. આ સમયે ગુજરાતનો ખેડૂત મજબુત બનીને સુભાષ પાલેકર દ્વારા સુચવેલી પ્રાકૃતિક પધ્ધતિ અનુસાર ખેતી કરતો થાય તો તેનું ઉત્પાદન અને આવક બે થી ત્રણ ગણી વધી શકે છે. પ્રાકૃતિક ખેતીમાં ગાયનું ખુબ જ મહત્વ છે. ગાય માતાના ગૌ-મુત્ર અને છાણમાં અખૂટ ઉત્પાદન શક્તિ છે. તે રાસાયણિક ખાતરમાં નથી
આ તકે રાજ્યપાલે પ્રાકૃતિક ખેતી અંગે સ્વ અનુભવો ખેડૂતો સાથે વાગોળ્યા હતાં, તથા પ્રાકૃતિક ખેતી કરનારા તમામ ખેડૂત ભાઈઓ-બહેનોને રૂબરુ મળીને તેમની સાથે વિગતવાર ચર્ચા કરી હતી.
જ્યારે આ તકે ભારત સરકારના કૃષિ રાજયપ્રધાન પુરૂષોત્તમભાઈ રૂપાલાએ જણાવ્યું હતું કે, આજના સમયમાં સુભાષ પાલેકર દ્વારા સુચવેલી પ્રાકૃતિક ખેતીની પધ્ધતિ આપણને સૌને સારૂ સ્વાસ્થ્ય પ્રદાન કરવામાં મહત્વની ભૂમિકા ભજવશે. પ્રાકૃતિક ખેતીની પધ્ધતિ વડે દેશના વડાપ્રધાન નરેન્દ્ર મોદીનું ખેડૂતોની આવક બમણી કરવાનું સપનું સાકાર થઈ રહ્યું છે.
