રાજકોટમાં જ્યુબિલી ગાર્ડન પાસે નાળામાંથી અજાણ્યા પુરૂષનો મૃતદેહ મળ્યો

રાજકોટના જ્યુબિલી ગાર્ડન પાસેના નાળામાંથી એક પુરૂષનો મૃતદેહ મળી આવ્યો હતો. પોલીસને પ્રાથમિક તપાસમાં મૃતક હોસ્પિટલમાંથી સારવાર દરમિયાન ભાગ્યો હોવાનું સામે આવ્યું છે. જોકે, પોલીસે મૃતદેહને પોસ્ટમોર્ટમ માટે મોકલીને વધુ તપાસ હાથ ધરી છે.

• નાળામાંથી મળ્યો અજાણ્યા યુવકનો મૃતદેહ
• પોલીસે મૃતકના વાલી વારસોની શોધખોળ હાથ ધરી
• મૃતકના શરીર પર સારવાર દરમિયાન જોવા મળતો કાપો જોવા મળ્યો

રાજકોટ: રાજકોટના જ્યુબિલી ગાર્ડન પાસેના શાક માર્કેટ નજીક એક નાળુ આવેલું છે. રાજકોટના એ ડિવિઝન પોલીસમથકને આ નાળામાં એક મૃતદેહ પડ્યો હોવાની માહિતી મળતા પોલીસ કર્મીઓ ઘટનાસ્થળે પહોંચ્યા હતા. યુવક પાસેથી તેની ઓળખ થઈ શકે તેવા કોઈ પુરાવા ન મળતા પોલીસે મૃતદેહને પોસ્ટમોર્ટમ માટે મોકલીને તેના વાલી વારસોની શોધખોળ હાથ ધરી છે.

મૃતક હોસ્પિટલમાંથી સારવાર દરમિયાન ભાગી છૂટ્યો હોવાની આશંકા

પોલીસને મૃતકના શરીર પર પેટના ભાગે અંદાજિત 7 ઈંચનો એક કાપો જોવા મળ્યો હતો અને તેમાં એક નળી પણ મૂકવામાં આવી હોવાનું ધ્યાને આવ્યું હતું. આ પરથી મૃતક પર તાજેતરમાં જ કોઈ ઓપરેશન કરવામાં આવ્યું હોવાનું તેમજ તે કોઇક હોસ્પિટલમાંથી સારવાર દરમિયાન ભાગી છૂટ્યો હોવાની આશંકા સેવાઈ રહી છે.