પોરબંદર જિલ્લા પંચાયત અને ત્રણેય તાલુકા પંચાયતમાં હોદેદારોની વરણી

પોરબંદર જિલ્લા પંચાયત તથા તાલુકા પંચાયત અને કુતિયાણા તાલુકા પંચાયત તથા રાણાવાવ તાલુકા પંચાયતના હોદ્દેદારોની ગુરુવારે વરણી કરાઈ હતી. જેમાં પોરબંદર જિલ્લા પંચાયત અને તાલુકા પંચાયત તથા કુતિયાણા તાલુકા પંચાયતના હોદ્દેદારોની સર્વાનુમતે વરણી કરવામાં આવી હતી, પરંતુ રાણાવાવ તાલુકા પંચાયતમાં પ્રમુખ પદના દાવેદાર માટે 2 દાવેદારો હોવાથી ચૂંટણી યોજાઈ હતી.

• પોરબંદર જિલ્લા,તાલુકા અને કુતીયાણા તાલુકા પંચાયતમાં સર્વાનુમતે હોદ્દેદારોની વરણી
• રાણાવાવ તાલુકા પંચાયતમાં પ્રમુખ પદ માટે 2 દાવેદાર વચ્ચે ચૂંટણી યોજાઈ
• ભાજપ આગેવાનો અને કાર્યકર્તા ઓએ અભિનંદન પાઠવ્યા

પોરબંદરઃ જિલ્લા પંચાયતમાં પ્રમુખ તરીકે મંજુ વનરાજભાઈ કારાવદરા તથા ઉપપ્રમુખ તરીકે ગોપાલભાઈ કોઠારી અને કારોબારી સમિતિના અધ્યક્ષ તરીકે રમેશભાઇ ઓડેદરા પટેલની વરણી સર્વાનુમતે કરવામાં આવી હતી. આ ઉપરાંત પોરબંદર તાલુકા પંચાયતમાં પ્રમુખ તરીકે પ્રતાપ કેશવાલા અને ઉપપ્રમુખ તરીકે બાલસ કેશુભાઈ અને કારોબારી અધ્યક્ષ તરીકે કેશુ ઓડેદરાની વરણી કરાઈ હતી, જ્યારે કુતિયાણા તાલુકા પંચાયતમાં પ્રમુખ તરીકે વિજયા ખૂટી અને ઉપપ્રમુખ તરીકે ભુરી વાસણ અને કારોબારી અધ્યક્ષ તરીકે અજય ઓડેદરાની સર્વાનુમતે વરણી કરવામાં આવી હતી. આ ચૂંટાયેલા તમામ હોદ્દેદારો અને કાર્યકર્તાઓ અને આગેવાનોએ શુભેચ્છા પાઠવી હતી.

આ પણ વાંચોઃ કચ્છ જિલ્લા પંચાયતના હોદ્દેદારો માટે ભાજપે નામ જાહેર કર્યા

રાણાવાવમાં પ્રમુખ અને ઉપ પ્રમુખ પદના 2 દાવેદારો થતા ચૂંટણી યોજાઈ

પોરબંદરના રાણાવાવ તાલુકા પંચાયતમાં પ્રમુખ અને ઉપપ્રમુખ પદ માટે 2 ઉમેદવારોએ દાવેદારી નોંધાવી હતી. જેમાં સામત મોઢવાડિયાને પ્રમુખ પદ માટે 14 મત મળતાં બહુમતીથી ચૂંટાઈ આવ્યા હતા. આ ઉપરાંત ઉપ પ્રમુખ તરીકે ગોપાલ ભાદરકાને 13 મત મળ્યાં હતાં. જેથી તેમને ઉપ પ્રમુખ જાહેર કરવામાં આવ્યા હતા અને ડૉ.ભરત આગઠની કારોબારી અધ્યક્ષ તરીકે વરણી કરાઈ છે.

આ પણ વાંચોઃ જૂનાગઢ જિલ્લા પંચાયતના પ્રમુખ તરીકે ભાજપના શાંતાબેન ખટારીયાની બિનહરીફ વરણી