ગાંધીનગર: રાજ્યમાં યોગને ઘરે-ઘરે પહોંચાડવા અને નાગરિકોમાં યોગ વિશે જાગૃતિ લાવવા, તંદુરસ્ત જીવન જીવવા માટે પ્રોત્સાહિત કરવા માટે ગુજરાત રાજ્ય યોગ બોર્ડ હંમેશાં પ્રયત્નશીલ કાર્ય કરતું આવ્યું છે. આ સંદર્ભે ગુજરાત રાજ્ય યોગ બોર્ડ દ્વારા યોગાસન સ્પર્ધા ૨૦૨૫નું આયોજન કરાયું છે.
ગુજરાત રાજ્ય યોગ બોર્ડની યાદીમાં જણાવ્યા અનુસાર ગત તા. ૯ ફેબ્રુઆરી, ૨૦૨૫ના રોજ ગુજરાતના તમામ જિલ્લાઓમાં યોગાસન સ્પર્ધા ૨૦૨૫નું આયોજન કરાયું હતું. આ સ્પર્ધામાં ૧૫,૦૦૦ થી વધુ સ્પર્ધકોએ ભાગ લીધો હતો. જેમાં વિજેતા સ્પર્ધકો આવતીકાલ એટલે કે, ૧૬ ફેબ્રુઆરીએ યોજાનાર ઝોન કક્ષાની સ્પર્ધામાં ભાગ લેશે. ગુજરાતના કુલ ૬ ઝોન અમદાવાદ, ગાંધીનગર, પંચમહાલ, જામનગર, સુરત અને રાજકોટ ખાતે ઝોન કક્ષાની સ્પર્ધા યોજાશે.
📢 ગુજરાત રાજ્ય યોગ બોર્ડ દ્વારા યોગસ્પર્ધા! 🏆✨
— Gujarat State Yog Board (@GujaratYogBoard) February 11, 2025
🔹 સમગ્ર ગુજરાતમાં જીલ્લા કક્ષાની યોગ સ્પર્ધાનું ભવ્ય આયોજન!
🔹 15,000+ યોગપ્રેમીઓએ ભાગ લીધો! 🙌
🔹 હવે આગામી ઝોન કક્ષાની સ્પર્ધા માટે તૈયાર રહો! pic.twitter.com/ag2GVonKtq
ઝોન કક્ષાની સ્પર્ધામાં જે જીતશે તેમને રોકડ ઈનામ અને સર્ટિફિકેટ આપવામાં આવશે. આ ઉપરાંત તેઓ રાજ્ય કક્ષાની યોગાસન સ્પર્ધા માટે પણ પસંદ થશે. રાજ્ય કક્ષાની સ્પર્ધામાં વિજેતા બનનાર સ્પર્ધકો ગુજરાતના સૌથી સારા યોગ ચેમ્પિયન ગણાશે અને તેઓ રાષ્ટ્રીય- આંતરરાષ્ટ્રીય યોગ સ્પર્ધાઓમાં ગુજરાતનું પ્રતિનિધિત્વ કરશે.
ઉલ્લેખનીય છે કે, ગુજરાત રાજ્ય યોગ બોર્ડ દ્વારા આ સ્પર્ધા યુવાનોને યોગ સાથે જોડવા માટે એક સારું માધ્યમ બની રહ્યું છે. વિદ્યાર્થીઓ, યુવા ખેલાડીઓ, શિક્ષકો અને યોગને પ્રેમ કરનારા દરેક નાગરિકો માટે આ સ્પર્ધા યોગના ક્ષેત્રમાં આગળ વધવાની સુવર્ણ તક મળી રહી છે.
