પોરબંદર : રાજ્યમાં ક્રાઈમના બનાવો દિવસેને દિવસે વધી રહ્યા છે. ખાસ કરીને શિયાળામાં ઠંડીનો લાભ લઈને તસ્કરો ચોરીને અજાંમ વધુ આપતા હોય છે. ત્યારે કુતિયાણામાં બેન્ક ATMમાં ચોરીનો બનાવ સામે આવતા ચકચાર મચી ગઈ હતી. કુતિયાણાના દેવડા નાકે યુનિયન બેન્કના ATMમાં ચોરીના પ્રયાસ કરનાર ત્રણ શખ્સોને પોલીસે ઝડપી લીધા છે. તારીખ 7 જાન્યુઆરીના રોજ ATMમાંથી ચોરીનો પ્રયાસ કરવામાં આવ્યો હતો. CCTVને આધારે એક સગીર સહિત ત્રણ આરોપીઓને પોરબંદર પોલીસે ઝડપીને આગળની કાર્યવાહી હાથ ધરી છે.
શું હતો સમગ્ર મામલો કુતીયાણા દેવડા નાકે આવેલા યુનીયન બેંકના બ્રાંચ મેનેજર પંકજ કૌશીક ખેડકરે ફરીયાદમાં જણાવ્યું હતું કે, કોઇ અજાણ્યા શખ્સોએ તારીખ 7 જાન્યુઆરી 2023 વહેલી સવારના 6 વાગ્યા આસપાસ યુનીયન બેંકના ATMના શટરનું તાળુ તોડી પ્રવશે કર્યો હતો. તેમજ ATMમાં લગાડેલા CCTV કેમેરા પર કલર સ્પ્રે માર્યો હતો. પોતાનો સામાન્ય ઇરાદો પાર પાડવા ATM મશીન કટર મશીન વડે તોડી મશીનમાં જમા પડેલા રોકડ રૂપિયાની ચોરી કરવાની કોશીશ કરી ગુનો કર્યો હતો.
આ પણ વાંચો અધિકારી ઉત્તરાયણ કરવા ગ્યા ને ઘરમાંથી ચોરાયા 18 લાખ, સવારે CCTV ચેક કરતા ખબર પડી
પોલીસે આરોપીને શોધી કાઢ્યા ફરીયાદના આધારે જુનાગઢ રેન્જના પોલીસ મહાનિરીક્ષક મયંકસિંહ ચાવડા તેમજ પોરબંદર પોલીસ અધિક્ષક ડૉ. રવિ મોહન સૈની એ જિલ્લાના અનડીટેક ગુનાઓ શોધી કાઢવા માટે સુચના આપેલી હતી. જે અન્વયે LCB P1 એચ.કે. શ્રીમાળીની રાહબરી હેઠળ LCB ટીમે ગુનામાં સંડોવાયેલા આરોપીઓને ખાનગી હકીકત આધારેચોરી કરવા માટે ઉપયોગ કરેલા સાધનો તેમજ મોટર સાયકલ સાથે પકડી પાડ્યા હતા.
પકડાયેલો મુદામાલ અને આરોપીઓ ચોરીનો પ્રયાસ કરવા માટે ઉપયોગ કરેલી બેટરીવાળુ કટર મશીન કિંમત 4000, કલર સ્પે નંગ 1 કિંમત 100, મોટર સાયકલ કિંમત 15,000 અને મોબાઇલ ફોન નંગ 3 કિંમત 20,000નો મુદામાલ જપ્ત કરેલો છે. આરોપીઓના નામ પ્રેમશંકર રાજેન્દ્રસિંહ રાઘવ (ઉ.વ. 24), બાલીસિંહ રાધેશ્યામ રાઘવ (ઉ.વ. 24) અને કાયદાના સંઘર્ષમાં આવેલ કીશોરને પોલીસે ધરપકડ કરીને આગળની કાર્યવાહી હાથ ધરી છે.
