પોરબંદરઃ ગુજરાત પોલીસના મહિલા સબ ઇન્સ્પેક્ટર આશા ગામીત ભારતીય કોસ્ટ ગાર્ડ (ICG)માં તાલીમ મેળવનારા ગુજરાતના પ્રથમ મહિલા સબ ઇન્સ્પેક્ટર બન્યા છે. જેઓ 13 પ્રોબેશનર્સ સબ ઇન્સ્પેક્ટરમાંથી એક છે.
કોસ્ટગાર્ડની કામગીરી માટેની તાલીમ ગાંધીનગરમાં કોસ્ટ ગાર્ડ રિજન (NW) ખાતે 23 જાન્યુઆરી 2020થી શરૂ કરવામાં આવી હતી. જેમાં સમુદ્ર સંબંધિત વિષયો અને દરિયાકાંઠાની સુરક્ષાના વિષયો શીખવવામાં આવ્યાં હતાં. આ ઉપરાંત 25 જાન્યુઆરી 2020ના રોજ તાલિમાર્થીઓને પોરબંદરમાં કોસ્ટ ગાર્ડ જિલ્લા હેડક્વાર્ટર નં. 1 ખાતે ભારતીય કોસ્ટ ગાર્ડના જહાજના પરિચય અને પરિચાલન માટે નિયુક્ત કરવામાં આવ્યાં હતાં.
પહેલી વખત ICG દ્વારા ગુજરાત પોલીસને તાલીમ આપવામાં આવી હતી. આમ, કાર્યક્રમના અંતમાં ICGના વરિષ્ઠ અધિકારીઓ, તાલીમાર્થીઓ અને ગાંધીનગરના SPની ઉપસ્થિતિમાં પ્રમાણપત્રો અને સ્મૃતિચિહ્નો એનાયત કરી તાલીમ કાર્યનું સમાપન કર્યુ હતું.
