પોરબંદરમાં ટ્રક નીચે આવી જતા સાયકલ સવારનું મોત

પોરબંદરઃ પોરબંદરમાં દિવસે ને દિવસે ટ્રાફિકની સમસ્યામાં વધારો થઇ રહ્યો છે, જેના કારણે અકસ્માતના બનાવો બની રહ્યા છે. શુક્રવાર રાત્રીના સમયે જલારામ કોલોની પાસે ટ્રકના વ્હીલમાં દબાઇ જવાથી સાઇકલ સવારનું કમકમાટી ભર્યું મૃત્યુ નીપજ્યું હતું અને આ ઘટનાની જાણ થતા કમલાબાગ પોલીસ સ્ટાફ ઘટના સ્થળે આવી પોહચ્યો હતો. પરંતુ ટ્રક ચાલક ટ્રક મૂકીને ફરાર થઇ ગયો હતો. લોકોના ટોળે ટોળા એકત્રિત થઇ ગયા હતા અને મૃતદેહને પોસ્ટર્મોટમ માટે સરકારી હોસ્પિટલમાં ખસેડાયો હતો.

પ્રાપ્ત વિગત મુજબ મૃતક સાયકલ સવાર બાબુભાઈ પાંજરી રાજીવનગર રહેનાર અને બોટમાં ખલાસીનું કામ કરતા હોય તેઓ રાત્રીના 8ની આસપાસ સાયકલ લઈને જતા હતા. તે દરમિયાન જલારામ કોલોની પાસે ટ્રક ના વ્હીલમાં આવી જતા કમકમાટી ભર્યું મૃત્યુ નીપજ્યું હતું. જયારે ટ્રક ચાલક ટ્રક મૂકી ફરાર થઇ ગયો હતો. જેને પકડવા કમલાબાગ પોલીસે તપાસ હાથ ધરી છે.