પાટણઃ ઉત્તર પ્રદેશના હાથરસમાં યુવતી પર સામૂહિક દુષ્કર્મ અને હત્યા કરવામાં આવતા સમગ્ર દેશમાં તેના ઘેરા પ્રત્યાઘાતો પડયા છે અને ઠેર-ઠેર વિવિધ સંગઠનો દ્વારા પ્રદર્શન અને વિરોધ કરી પીડિત પરિવારને ન્યાય માટે માંગણીઓ કરવામાં આવી રહી છે.
ત્યારે કોંગ્રેસના સાંસદ રાહુલ ગાંધી અને પ્રિયંકા ગાંધીનો કાફલો પીડિતાના પરિવારને મળવા હાથરસ ખાતે જવા નીકળ્યો હતો અને આ કાફલો યમુના એક્સપ્રેસ હાઈવે પર પહોંચતા જ પોલીસે તેમની અટકાવી દીધા હતા. જેથી રાહુલ ગાંધી અને કોંગ્રેસ કાર્યકરોએ પગપાળા કૂચ કરતા પોલીસે રાહુલ ગાંધી અને કોંગ્રેસ કાર્યકરો પર લાઠીચાર્જ કર્યો હતો. આ મામલે પાટણના કોંગ્રેસના આગેવાનો કાર્યકરોએ શહેરના બગવાડા દરવાજા ખાતે ધરણા યોજી સરકારનો વિરોધ કર્યો હતો.
પાટણના ધારાસભ્ય ડો. કિરીટ પટેલે જણાવ્યું હતું કે, મહિલાઓની સુરક્ષા અને સલામતીની વાતો કરનાર ભાજપ સરકારના શાસનમાં મહિલાઓ સલામત નથી માટે કેન્દ્ર અને રાજ્ય સરકાર રાજીનામું આપે તેવી માંગ કરી હતી.
