સંયુક્ત આરબ અમીરાતના અબુધાબી પોર્ટ પર ફિશિંગ કરવા સાત મહિના અગાઉ ગણદેવી મેધરભાટના પાંચ ખલાસીઓ ગયા હતા. જેમાં મગન રામજીભાઈ ટંડેલ, દિનેશ રામજીભાઈ ટંડેલ, ચંપક કાનજીભાઈ ટંડેલ, રાજેશ કાંતિભાઈ ટંડેલ અને રાજેશ ગૌરીશંકર ટંડેલનો સમાવેશ થાય છે. તેઓ ગત તા 31 ડિસેમ્બર 2018થી ક્રમશઃ અબુધાબી પહોંચ્યા હતા. જેમાં જારોમ રાશેદ અલી અલ હસીબ અલ ઝાબીની એ. ડબલ્યુ.21-32 નંબરની ફીશિંગ બોટ પર માછીમારી કરવાનું કામ શરૂ કર્યું હતું.
અબુધાબીના દરિયામાં માછીમારી કરી બોટ માલિકને સારી એવી કમાણી કરી આપી હતી. તેમ છતાં બોટ માલિકે યેનકેન પ્રકારે મહેનતાણું કે તેમનો હિસ્સો ચૂકવ્યો ન હતો. દેવું કરીને અબુધાબીની સફર બાદ મહેનતાણું ન મળતા તેઓની કફોડી હાલતમાં મુકાયા હતા. આ ઉપરાંત ઘર પરિવાર માટે પણ પૈસા ન મોકલી શકાતા તેઓના પરિવારની હાલત પણ દયનીય બની ગઈ હતી.
તે દરમિયાન ગત તા 1/5/19ના રોજ અબુધાબીમાં માછીમારીની સીઝન પૂર્ણ થતાં કામકાજ બંધ થઇ ગયું હતું. તેમ છતાં સ્વદેશ પરત ફરવાની મંજૂરી પણ આપવામાં આવી ન હતી. જેના કારણે તેઓે અને પરીજનોને કપરી સ્થિતિમાં રહેવા મજબૂર બન્યા છે.
આ સમગ્ર ઘટના બાદ તેઓએ સ્થાનિક પોલીસમાં અરજી કરતા પોલીસે પાસપોર્ટ અપાવ્યા હતા. જે બાદ ત્રણ સપ્તાહ અગાઉ ગત તા.21/6/19ના રોજ તેઓએ સ્વદેશ પરત ફરવા શારજાહથી સુરતની કન્ફરમેશન ટિકિટ કરાવી હતી. પરંતુ, ફ્લાઇટ પકડવા એરપોર્ટ પહોંચ્યા ત્યાં તો બોટ માલિકે તેમની ઉપર કેસ કરી દેતા એરપોર્ટે ક્લિયરન્સના અભાવે સ્વદેશ આવી શક્યા ન હતા. આ સમગ્ર ઘટનાની આપવીતી પરિવારજનોને જણાવતા પરિવાર પર આભ તૂટી પડ્યુ હતું. જેના પગલે મૅધરભાટ ગામના અગ્રણી ઠાકોર ટંડેલ, તાલુકા પંચાયત સભ્ય મથુરભાઈ ટંડેલ અને તમામ 5 ખલાસીઓના પરિવારજનોએ સાંસદ સી.આર. પાટીલની મુલાકાત લઈ સમગ્ર ઘટનાની જાણ કરી હતી. જે બાદ સાંસદે ભારત સરકારના વિદેશ મંત્રાલયનો સંપર્ક સાધી પાંચેય ખલાસીઓને સ્વદેશ પરત લઈ આવવાનો દિલાસો આપ્યો હતો.
