શિવ ભક્તો માટે ખુશખબર, જલ્દી શરૂ થઈ શકે છે કૈલાશ માનસરોવર યાત્રા, ભારત-ચીન થયા સહમત

કૈલાશ માનસરોવર યાત્રા ટૂંક સમયમાં ફરી શરૂ કરવાના પ્રયાસો કરવામાં આવી રહ્યા છે. પવિત્ર કૈલાશ માનસરોવર ભગવાન શિવનું ધામ છે.

બેઈજિંગઃ ભારત અને ચીન કૈલાશ માનસરોવર યાત્રા સહિત ઘણા મહત્વપૂર્ણ મુદ્દાઓ પર સહમત થયા છે. કૈલાસ માનસરોવર યાત્રીઓ માટે આ સારા સમાચાર છે. એવી અપેક્ષા રાખવામાં આવે છે કે કૈલાશ માનસરોવર યાત્રા ટૂંક સમયમાં ફરી શરૂ કરવા માટે વિચારણા થઈ શકે છે. તમને જણાવી દઈએ કે કૈલાશ માનસરોવર યાત્રા છેલ્લા પાંચ વર્ષથી ભારતીયો માટે બંધ છે.

કોરોના બાદથી કેલાશ માનસરોવર યાત્રા બંધ
કૈલાશ માનસરોવર સૌથી પવિત્ર સ્થળોમાંનું એક છે. હિંદુ માન્યતાઓ અનુસાર આ ભગવાન શિવનો વાસ છે. તમને જણાવી દઈએ કે કૈલાશ માન સરોવર યાત્રા કોરોના કાળથી બંધ છે. કોરોના દરમિયાન ઘણા નિયંત્રણો લાદવામાં આવ્યા હતા. આ સાથે જ ગલવાન ખીણમાં હિંસા થઈ હતી જેના પછી બંને દેશો વચ્ચે તણાવ વધી ગયો હતો.

માનસરોવર યાત્રા માટે ત્રણ રસ્તાઓ
કૈલાશ માનસરોવર હિમાલયની પર્વતમાળાનો એક ભાગ છે. આ સ્થળ તિબેટમાં આવેલું છે પરંતુ તે ચીનના અધિકારક્ષેત્રમાં છે. અહીં જવા માટે ચીનના ટૂરિસ્ટ વિઝા લેવા જરૂરી છે. કૈલાશ માનસરોવર યાત્રા માટે ત્રણ મુખ્ય રૂટ છે. તેમાંથી પહેલો લિપુલેખ પાસ, બીજો નાથુ લા પાસ અને ત્રીજો શિગસ્તે રોડ છે.

અગાઉ, વિદેશ પ્રધાન એસ જયશંકરે તેમના ચીની સમકક્ષ સાથે માનસરોવર યાત્રા શરૂ કરવા અને બંને દેશો વચ્ચે તમામ હવાઈ સેવાઓ પુનઃસ્થાપિત કરવા જેવા મુદ્દાઓ પર ચર્ચા કરી હતી.

ભારત અને ચીન વચ્ચે ઉચ્ચ સ્તરીય બેઠકમાં સહમતી
બુધવારે ચીન અને ભારત વચ્ચે ઉચ્ચ સ્તરીય બેઠક યોજાઈ હતી. આ દરમિયાન બંને દેશો ઘણા મહત્વપૂર્ણ મુદ્દાઓ પર સહમત થયા હતા. જેમાં મુખ્યત્વે ચીન સરહદ વિવાદને કારણે ચાલી રહેલી મડાગાંઠને ઉકેલવાનો પ્રયાસ કરવામાં આવ્યો હતો. આ પહેલા પણ બંને દેશો વચ્ચે અનેક રાઉન્ડની બેઠકો થઈ ચૂકી છે.

બેઠક દરમિયાન, બંને પક્ષો સરહદ પર શાંતિ અને સ્થિરતા જાળવવાના પગલાં પર સહમત થયા હતા. સૈન્ય વાટાઘાટો માટે મિકેનિઝમ મજબૂત કરવાની સાથે ભારતમાં આવતા વર્ષે એક બેઠકનું આયોજન કરવામાં આવ્યું હતું. ચીનના વિદેશ મંત્રાલયની એક અખબારી યાદીમાં જણાવવામાં આવ્યું છે કે, ચીનના વિશેષ પ્રતિનિધિ વાંગ યી અને ભારતના વિશેષ પ્રતિનિધિ અને રાષ્ટ્રીય સુરક્ષા સલાહકાર ડોભાલે ચીન-ભારત સરહદ મુદ્દે મહત્ત્વપૂર્ણ ચર્ચા કરી હતી અને છ સહમતિ પર પહોંચી ગયા હતા.

વિશેષ પ્રતિનિધિઓએ કૈલાશ માનસરોવર યાત્રા ફરી શરૂ કરવા અંગે પણ ચર્ચા કરી હતી. એનએસએ ડોવાલે વાંગ યીને ભારત આવવા આમંત્રણ આપ્યું હતું. 2020માં ભારત-ચીન સરહદી વિસ્તારોના પશ્ચિમી સેક્ટરમાં મુકાબલો બાદ SRsની આ પ્રથમ બેઠક હતી.

આ પણ વાંચો: