- જિલ્લા આત્મા પ્રોજેક્ટ દ્વારા પ્રાકૃતિક ખેતી કરતા ખેડૂતોને બજાર પૂરૂ પાડવાના પ્રયાસો
- પ્રાકૃતિક ખેતી કરતા ખેડૂતો પોતાની ઉપજ સીધી શહેરીજનોને વેચી શકશે
- ઓર્ગેનિક ખેત પેદાશોના વેચાણ અર્થે નવસારી કોર્ટ પરિસરમાં સ્ટોલ ઉભા કરાયા
નવસારી : કોરોના કાળમાં લોકો પોતાના આરોગ્ય પ્રત્યે જાગૃત થયા છે, જેમાં ખેડૂતોને પ્રાકૃતિક ખેતી તરફ વાળવા ગુજરાતના રાજ્યપાલે પણ બીડું ઝડપ્યું છે. ખેડૂતો રાસાયણિક ખેતી છોડી ઓર્ગેનિક ખેતી કરીને આરોગ્યપ્રદ ખેત પેદાશો પકવે એ દિશામાં પ્રયાસો થઇ રહ્યા છે. જે અંતર્ગત જિલ્લાના પ્રાકૃતિક ખેતી કરતા ખેડૂતોની ઉપજને બજાર મળી રહે એ હેતુથી આત્મા પ્રોજેક્ટ દ્વારા અઠવાડિક અમૃત આહાર મહોત્સવનું આયોજન કરવામાં આવ્યુ છે.
કોરોના કાળમાં ખેડૂતો અને ગ્રાહકો વચ્ચે સેતૂ બન્યો આત્મા પ્રોજેક્ટ
મનુષ્યની રોગપ્રતિકારક શક્તિ પ્રબળ હશે, તો કોરોના વાયરસને મજબૂતીથી હરાવી શકશે. જેને માટે લોકો ખોરાક ઉપર વધુ ધ્યાન આપતા થયા છે. પરિણમે પ્રાકૃતિક (ઓર્ગેનિક) ખેત પેદાશોની માંગ વધી છે. ત્યારે નવસારીજનોને ઓર્ગેનિક શાકભાજી, ડાંગર, કઠોળ સહિતની ચીજ-વસ્તુઓ મળી રહે અને પ્રાકૃતિક ખેતી કરતા ખેડૂતોને પણ યોગ્ય ભાવ સાથે બજાર મળી રહે એવા પ્રયાસો આત્મા પ્રોજેક્ટ દ્વારા કરાયા છે.
