GPCBએ કરોડોના દંડની નોટીસ ફટકારતા ઉદ્યોગપતિઓની બેઠક મળી

મોરબીઃ શહેરમાં ધમધમતા સિરામિક ઉદ્યોગમાં કોલગેસીફાયરનો વપરાશ પર પ્રતિબંધ લાદવામાં આવ્યો હતો. જેના પર નેશનલ ગ્રીન ટ્રીબ્યુનલ દ્વારા ચુકાદો આપવામાં આવ્યો હતો. જેમાં કોલગેસ પ્રતિબંધ લાગુ પડ્યા બાદ પ્રદુષણનો સર્વે કરાયો હતો. આ સર્વેમાં વ્યાપક પ્રદુષણ ધ્યાનમાં આવતા કમિટીએ સોપેલા રીપોર્ટને આધારે અગાઉ કોલગેસ વાપરતા 608 સિરામિક એકમોને 450 કરોડથી વધુનો દંડ ફટકાર્યો છે.

એક પછી એક સિરામિક એકમોને નોટીસ ફટકારવાનું શરુ કરતા ઉદ્યોગકારોમાં નિરાશા વ્યાપી ગઈ છે. GPCBની નોટિસોને પગલે મોરબી સિરામિક એસોસિએશન હોલ ખાતે સિરામિક ઉદ્યોગપતિઓની બેઠક મળી હતી. જેમાં આ મુદ્દે તમામ માલિકો સાથે ચર્ચા કરવામાં આવી હતી.

મીડિયા સાથેની વાતચીતમાં સિરામિક એસોસિએશનના પ્રમુખે જણાવ્યું હતું કે, GPCB દ્વારા અંદાજે 450થી 500 કરોડના દંડની નોટીસ સિરામિક એકમોને ફટકારવામાં આવી છે. જે મામલે અમે વકીલની સલાહ લઈને GPCBને જવાબ આપીશું.

સિરામીક ઉદ્યોગકારોએ આ મુદ્દે જરૂર પડતા હાઈકોર્ટ સુધી લડત આપવાની પણ તૈયારી દર્શાવી છે. મંદીના માહોલમાં GPCBએ ફટકારેલા દંડને પગલે ઉદ્યોગપતિઓમાં નિરાશા અને રોષ જોવા મળી રહ્યો છે.