હળવદમાં ટ્રકમાં લાગી આગ, ડ્રાઈવરે સળગતા ટ્રકને ગામ બહાર લઇ જઇને બહાદુરી દાખવી

મોરબી: કાળઝાળ ગરમીમાં અનેક સ્થળે આગના બનાવો બનતા રહે છે. આજે બુધવારે ટીકર ગામે ઘાસ ભરેલા ટ્રકમાં આગ લાગતા અફરાતફરી મચી ગઈ હતી. પરંતુ ટ્રકના ડ્રાઈવરે ટ્રકને ગામની બહાર મૂકી આવીને બહાદુરી દાખવી હતી.

પ્રાપ્ત વિગતો અનુસાર, ટીકર ગામે ઘાસ ભરેલા ટ્રકમાં બપોરના સુમારે ઓચિંતી આગ ભભૂકી ઉઠી હતી અને ગામના મકાન પાસે પાર્ક કરેલી ટ્રકમાં આગ ફાટી નીકળતા થોડીવાર માટે ગ્રામજનોના જીવ તાળવે ચોંટયા હતા. જો કે, કોઈ અણબનાવ બન્યો ન હતો.

જો કે, અફરાતફરીના માહોલ વચ્ચે સળગતા ટ્રકને ડ્રાઈવર ચલાવવા લાગતા ગ્રામજનો પણ આશ્ચર્યમાં મુકાયા હતા. સળગતા ટ્રકને ચાલક ગામની બહાર સુધી મૂકી આવ્યો હતો. જેથી કોઈ અનિચ્છનીય બનાવ બન્યો ન હતો. જો કે, બહાદુરી દાખવનાર ટ્રકના ચાલક સહિતના બે વ્યક્તિ દાઝી જતા સારવાર માટે હોસ્પિટલમાં ખસેડવાની ફરજ પડી હતી.