મોરબીમાં કર્મચારી 50 હજાર રોકડા અને બાઈક લઇ ગાયબ

મોરબીઃ મોરબી-માળિયા હાઇવે પર આવેલી ટ્રેડીંગ કંપનીનો એક કર્મચારી કંપનીના રૂ. 50 હજાર રોકડા અને બાઇક લઈને છુમંતર થઈ ગયો હોવાની ફરિયાદ કંપનીના મેનેજરે મોરબી B ડિવિઝન પોલીસ મથકમાં નોંધાવી છે.

મળતી વિગત મુજબ, મોરબી-માળિયા નેશનલ હાઇવે પર આવેલ વાસુકી ટ્રેડિંગ પ્રા.લિ.ની ઓફિસમાં છેલ્લા 8 માસથી દશરથ રાઠોડ નામનો વ્યક્તિ પેઢીમાં કામ કરતો હતો. જે ગત 8મી તારીખે કંપનીના રૂ. 50,000, 20,000 રૂ.ની કિંમતનું બાઈક GJ 03 FL 9588 અને ટ્રાન્સપોર્ટની રોજમેળની ડાયરી લઇ પીપળીયા ચાર રસ્તે આવેલ કોલસાના સાઈઝીંગ પ્લાન્ટે આપવા ગયો હતો. પરંતુ આરોપી દશરથ ત્યાં પહોંચ્યો ન હતો તેમજ પરત પણ ફર્યો ન હતો. તેથી વાસુકી કંપનીના મેનેજર જસમીન માંઠકે સીટી B ડિવિઝન પોલીસ મથકમાં ફરિયાદ નોંધાવી છે. મોરબી B ડિવિઝન પોલીસ મથકના PSI એલ. બી. બગડા વધુ તપાસ ચલાવી રહ્યા છે.