લુણાવાડા:હાલમાં કોરોના વાયરસના કહેર સામે લોકડાઉન અમલમાં આવ્યું છે. ત્યારે આવા કપરા સમયમાં કેટલાક લોકો, સેવાભાવીઓના નિઃસ્વાર્થ સેવા ભાવથી દિવડા ગામ તેમજ કડાણા તાલુકાના ગ્રામ્ય વિસ્તારોમાં રોજનુ પેટીયું રળી ખાનાર ગ્રામજનો અને કપરી મુશ્કેલીમાં મુકાયેલા લોકોની વહારે જઇ સેવાયજ્ઞ કરી રહ્યા છે.
ત્યારે કડાણા પોલીસ તેમજ આગેવાન સેવાભાવી મિત્રો દ્વારા કપરાં સમયમાં જરૂરિયાત મંદ લોકોને રાશન કીટનું વિતરણ કરવામાં આવી રહ્યું છે.
મહિસાગર જિલ્લા પોલીસ વડા ઉષા રાડા (દેસાઇ) તેમજ કડાણા પોલીસ મથકના પી.આઇ મુકેશસિંહ પરમાર અને તેમની ટીમ દ્વારા જરૂરિયાત મંદ લોકોને 100થી વધુ રાશન કીટ વિતરણ કરી "પોલીસ પ્રજાનો મિત્ર" તેમ સાબિત કર્યું છે.
આ રાશનકીટમાં લોટ, ચોખા, દાળ, મરચું-મીઠું, ચા, ખાંડ જેવી જીવન જરૂરિયાતની ચીજવસ્તુઓ સામેલ છે. છેલ્લા કેટલાક દિવસમાં લોકડાઉન બાદ પોલીસે કરેલી કડક કાર્યવાહી બાદ કડાણા પોલીસની આ લોકસેવાની સરાહનીય કામગીરી કડાણા તાલુકામાં પોલીસની પ્રશંસા થઈ રહી છે ત્યારે કડાણા-મહીસાગર જિલ્લા પોલીસ તંત્રમાં જોખમ સર્વત્ર જોખમ યચ્ચે સર્વત્ર સેવાનો જુસ્સો બરકરાર જોવા મળ્યો છે.
આ સેવા યજ્ઞના યોગીઓ એવા તથાતા ફાઉન્ડેશનના પ્રમુખ નરેશ દેસાઈ, વ્યાપારી અગ્રણીઓ શૈલેન્દ્રસિંહ પુવાર,કેતન દાણી, દીવડા સરપંચ સંગીતાબેન પંચાલ, ડેપ્યુટી સરપંચ જયદીપસિંહ પુવાર સહિત આગેવાનોની ઉપસ્થિતિમાં સોશિયલ ડિસ્ટન્સિંગ જાળવી રાશન કીટનું વિતરણ કરવામાં આવ્યું હતું.
