કચ્છઃ કોરોનાના કહેર વચ્ચે લોકોને ભારે મુશ્કેલી વેઠવી પડી છે. જો કે અનલોક બાદ લોકો ધીમેધીમે પોતાના વેપાર ધંધા તરફ વળી રહ્યાં છે. ત્યારે ગરીબ અને મધ્યમ વર્ગના લોકોને મનરેગા યોજના હેઠળ રોજગારી મળી રહી છે. માત્ર ખેતી આધારિત આવક ધરાવતા રાપર તાલુકામાં 97 ગામો અને 227 વાંઢ વિસ્તારના 36 ગામોમાં મનરેગાના કામો થઈ રહ્યા છે. ગેડી, ત્રંબૌ, જાટાવાડા, કલ્યાણપર, આણંદપર, વૃજવાણી, રામવાવ, શિરાંની વાંઢ સહિતના ગામોમાં મનરેગા હેઠળ 49 કામો શરૂ કરવામાં આવ્યાં છે. જે યોજના અંતર્ગત 3674 લોકો દરરોજ રોજગારી મેળવી રહ્યાં છે.
કચ્છના રાપરમાં મનરેગાના 49 કામો શરૂ, લોકોને મળી રોજગારી તાલુકા વિકાસ અધિકારી ડી. જે. ચાવડાએ જણાવ્યું હતું કે, હજુ જેમ જેમ લોકોની રોજગારી માટે માંગણી આવશે, તે રીતે તમામ ગામોમાં મનરેગા યોજનાના કામો શરૂ કરવામાં આવશે. રાપર તાલુકા પંચાયત જરૂરિયાત લોકોને રોજગારી મળે તે માટે હંમેશા પ્રયત્નશીલ રહેશે. મનરેગાની મજૂરીની રકમ શ્રમિકના બેંક ખાતામાં સીધી જમા કરવામાં આવે છે. મનરેગાના કામોને પગલે શ્રમિકોની મદદ મળી રહી છે. કચ્છ જિલ્લા વિકાસ અધિકારી પ્રભવ જોશી દ્વારા સમયાંતરે મનેરગાના કામોની સમીક્ષા કરવામાં આવી રહી છે. રાપર તાલુકા વિકાસ અધિકારી ડી. જે ચાવડાના માર્ગદર્શન હેઠળ આ મનરેગા યોજનાની કામગીરીમાં રાપર તાલુકા પંચાયત કચેરીના આસિસ્ટન્ટ પ્રોગ્રામ ઓફિસર એ.એચ. પરમાર, બી.એન. ગોહિલ, એમ.ડી. પરમાર અને એન.બી સુથાર દેખરેખ રાખી રહ્યાં છે.
