ખેડાઃ એવું કહેવાય છે કે ડાકોરની મુલાકાત ગોટાના સ્વાદ વગર અધૂરી છે. સુપ્રસિદ્ધ યાત્રાધામ ડાકોરના ઠાકોર શ્રીરણછોડરાયજીના દર્શન કરી ગોટાનો સ્વાદ લીધા વિના ડાકોરની મુલાકાત અધૂરી ગણાય છે. ગોટા જાણે કે ડાકોરનો પ્રસાદ ગણાય છે. ડાકોરમાં રણછોડરાયજીના દર્શન બાદ સ્વાદ રસિકો ગોટાનો સ્વાદ અચૂક માણે છે. આ સાથે જ પોતાના સ્વજનો માટે પણ ગોટા પાર્સલ કરાવી ઘરે લઈ જાય છે.
હાલ ડાકોરના પ્રખ્યાત ગોટા બનાવનાર બાપાલાલની પાંચમી પેઢી વારસો જાળવી રહી છે. ડાકોર રણછોડજી મંદિરની સામે ગોમતી ઘાટ પર પાંચ પેઢીથી ગોટા બનાવવામાં આવે છે, જ્યાં સ્વાદ રસીકો ગોટાનો સ્વાદ માણે છે. ચણાના લોટ અને દૂધથી આ સ્વાદિષ્ટ ગોટા બનાવવામાં આવે છે.
શરૂઆતમાં જ્યારે યાત્રાધામમાં શ્રદ્ધાળુઓ દર્શનાર્થે આવતાં ત્યારે કઈ ખાવાનું તો ઠીક બહારનું પાણી પણ પીતા નહોતા, પણ જો દૂધનો ઉપયોગ કરી વસ્તુ બનાવીએ તો તે પ્રસાદ ગણાય તેને લઈ ગોટામાં દૂધ નાખવાની શરૂઆત થઈ હોવાનું બાપાલાલની પેઢીના વિનોદભાઈ જણાવી રહ્યાં છે. સમગ્ર ગુજરાત સહિત દેશભરમાંથી આવેલા યાત્રાળુઓ દહીં સાથે હોંશે-હોંશે ગરમાગરમ ગોટાની લિજ્જત માણે છે. સ્વાદ રસિયાઓ માટે હાલ અનેકવિધ ચીજો ઉપલબ્ધ હોવા છતાં ગોટાની માંગ દિવસે દિવસે વધતી જતી હોવાનું વિનોદભાઈ જણાવે છે.
સ્વાદ રસીક ગ્રાહકો માને છે કે, ગોટા બીજે ક્યાંય પણ ખાવ કે તૈયાર લોટ ઘરે લઈ જઈને બનાવો તો પણ ડાકોરના ગોટાનો સ્વાદ અહીં જેવો નથી મળતો. અહીંના ગોટાની લિજ્જત અનેરી હોવાનું જણાવી રહ્યાં છે. ત્યારે ડાકોરની મુલાકાત વેળા ગરમાગરમ ગોટાનો સ્વાદ માણવા જેવો ખરો.
