જૂનાગઢમાં ગુરુ પૂર્ણિમાના તહેવાર નિમિત્તે ગોરખનાથ આશ્રમ ખાતે ઉજવણી કરાશે

જૂનાગઢઃ જૂનાગઢમાં આવેલા ભવનાથ સ્થિત ગોરખનાથ આશ્રમ ખાતે 16 જૂલાઇના રોજ ગુરુપૂર્ણિમા તહેવારની ઉજવણી કરવામાં આવશે. આ નિમિત્તે હજારોની સંખ્યામાં ભાવિક ભક્તો હાજર રહેશે.

આગામી ગુરુ પૂર્ણિમાના તહેવારને લઈને ભવનાથમાં આવેલા આશ્રમમાં ગુરુ-શિષ્યની પરંપરાને ઉજાગર કરવા માટે તૈયાર થઇ રહ્યા છે. આદિ-અનાદિ કાળથી ચાલતી આવતી ગુરુ શિષ્ય પરંપરા અને તેના પર રચવામાં આવેલી ભારતીય સંસ્કૃતિ આજે પણ કાયમ જોવા મળે છે. ગુરુ અને શિષ્યના સંબંધો કોઈપણ વ્યક્તિ માટે મહત્વના હોય છે. ત્યારે જે દેશની સંસ્કૃતિ ગુરુ-શિષ્યની પરંપરાને આધીન હોય તેવા આપણા ભારતમાં ગુરુપૂર્ણિમાના તહેવારને લઈને ખૂબ જ ઉત્સાહ જોવા મળી રહ્યો છે.

ગુરુ પૂર્ણિમાના પાવન અવસરે ભવનાથ સ્થિત ગુરુ ગોરખનાથ આશ્રમમાં હજારોની સંખ્યામાં શેરનાથ બાપુના સેવકો હાજરી આપશે. ગોરખનાથ આશ્રમમાં આવનાર તમામ ભક્તો અને સેવકો માટે 365 દિવસ અને 24 કલાક વિનામુલ્યે ભોજન પ્રસાદની પણ વ્યવસ્થા હોય છે. ભવનાથ પરીક્ષેત્રમાં આ એક જ એવું સ્થાન છે, જ્યાં આવનાર કોઈપણ ધર્મમાં કે કોઈપણ જ્ઞાતિના સેવકો માટે આદરપૂર્વક ભોજન પ્રસાદની વ્યવસ્થા કરવામાં આવે છે. અહીં ગુરુ પૂર્ણિમાના દિવસે શેરનાથ બાપુના સેવકો અને તેમના શિષ્યો આવીને બાપુના આશીર્વચન મેળવી તેઓ પોતાને ધન્ય કરશે.