Junagadh News: જૂનાગઢ અને સિડની યુનિવર્સિટી વચ્ચે શિક્ષણને લઈને કરાર, વિદ્યાર્થીઓને થશે આ લાભ

જૂનાગઢ એગ્રીકલ્ચર યુનિવર્સિટી અને વેસ્ટર્ન યુનિવર્સિટી ઓફ સિડની વચ્ચે કૃષિ શિક્ષણને લઈને મહત્વના કરાર પૂર્ણ થયા છે. ગત સોમવારે દિલ્હી ખાતે બંને યુનિવર્સિટીઓ દ્વારા વિદ્યાર્થીઓના અભ્યાસને લઈને કરાર કરવામાં આવ્યા છે. ભારત અને ઓસ્ટ્રેલિયાના કૃષિ શિક્ષણને પરસ્પર સાંકળીને યુનિવર્સિટીમાં અભ્યાસ કરતા વિદ્યાર્થીઓને વિશ્વ કક્ષાના કૃષિ શિક્ષણ અને ટેકનોલોજી આ કરાર થકી પ્રાપ્ત થશે તેવો વિશ્વાસ જૂનાગઢ યુનિવર્સિટીના કુલપતિ વી પી ચોવટીયાએ કર્યો છે.

જૂનાગઢ: એગ્રીકલ્ચર યુનિવર્સિટી અને વેસ્ટર્ન યુનિવર્સિટી ઓફ સીડની વચ્ચે કૃષિ ક્ષેત્રમાં અભ્યાસ કરી રહેલા વિદ્યાર્થીઓ માટે મહત્વના કરાર ગત સોમવારે દિલ્હી ખાતે કરવામાં આવ્યા છે. આ કરાર અંતર્ગત જૂનાગઢ એગ્રીકલ્ચર યુનિવર્સિટીમાં સ્નાતક અભ્યાસક્રમમાં શિક્ષણ મેળવી રહેલા વિદ્યાર્થીઓ ત્રણ વર્ષ જૂનાગઢ અને એક વર્ષ ઓસ્ટ્રેલિયાની વેસ્ટર્ન યુનિવર્સિટીમાં અભ્યાસ કરીને જૂનાગઢની સાથે વેસ્ટર્ન યુનિવર્સિટીનું પણ પ્રમાણપત્ર પ્રાપ્ત કરી શકશે. આગામી દિવસોમાં વેસ્ટન યુનિવર્સિટીના અધ્યાપકો વિદ્યાર્થીઓની પસંદગી માટે જૂનાગઢ પણ આવી શકશે. જે વિદ્યાર્થીઓ પસંદગી પામશે તેમને જૂનાગઢ કૃષિ યુનિવર્સિટીની સાથે વેસ્ટર્ન યુનિવર્સિટી સીડનીનું પણ સ્નાતક પ્રમાણપત્ર આપવામાં આવશે.