દેશના વડાપ્રધાન અને રાજ્યના તત્કાલીન મુખ્યપ્રધાન નરેન્દ્ર મોદીએ જુનાગઢના ગિરનારને સુવિધા સંપન્ન બનાવવાનું સપનું જોયું છે. ત્યારે આ બધું હવે તૈયાર થવાની દિશામાં જ છે. જ્યારે રાજ્ય સરકાર દ્વારા આ પ્રોજેક્ટ ડિસેમ્બર ૨૦૧૯ સુધીમાં પૂર્ણ થઈ જશે એવું પણ અનુમાન લગાવવામાં આવ્યું છે. ત્યારે આ પ્રોજેક્ટ પૂર્ણ થયા બાદ યાત્રાળુઓની સંખ્યામાં વધારો થશે. આ યાત્રાળુઓને સારી સુવિધાઓ મળી રહે જેવી કે શૌચાલયની સુવિધા, રેસ્ટ હાઉસની સુવિધા તથા યાત્રાળુઓના ધસારાને અનુલક્ષીને પીવાના પાણીની તમામ પ્રાથમિક સુવિધાઓ મળી રહે તે માટે જંગલની જમીનનો ઉપયોગ કરવામાં આવશે. આ માટે આજે ખાસ બેઠક યોજીને રાજ્યના ફોરેસ્ટ વિભાગ દ્વારા અંબાજી મંદિરની પાસે આવેલ 0.2785 હેક્ટર જમીન આપવાનો સૈદ્ધાંતિક નિર્ણય કરવામાં આવ્યો છે.
આ બાબતે રાજ્યના મુખ્ય પ્રધાન વિજય રૂપાણીએ જણાવ્યું હતું કે ગિરનાર રોપ-વેની હાલ ચાલી રહેલી કામગીરી આગામી ડિસેમ્બર સુધીમાં પૂર્ણ થતાં હવે યાત્રિકો માટે રોપ-વે શરૂ થઇ જશે. જેના પરિણામે અંબાજી પર યાત્રીઓનો ધસારો વધશે. તેમની સુવિધા માટે પીવાના પાણીની શૌચાલયની અને સુરક્ષા માટે ફેંન્સીંગ તથા વિશ્રામ માટે ચોકની સગવડોની જરૂરિયાત ઊભી થવાની છે, ત્યારે પવિત્ર યાત્રાધામ વિકાસ બોર્ડ દ્વારા આ માટે કુલ રૂપિયા 7 કરોડનો પ્રોજેક્ટ હાથ ધરવામાં આવ્યો છે. તે પૈકી પ્રારંભિક તબક્કે રૂપિયા ૪ કરોડ જેવી રકમ યાત્રાળુઓની સુવિધાના કામો માટે કરવામાં આવશે. જ્યારે મહત્વની વાત એ છે કે, આ તમામ વિકાસ કાર્યોમાં એક પણ વૃક્ષનું નિકંદન કરવામાં નહીં આવે. રૂપાણીએ વધુમાં માહિતી આપતા જણાવ્યું હતું કે, કેવડિયા કોલોની ખાતે સ્ટેચ્યુ ઓફ યુનિટી સાથેના પ્રવાસન આકર્ષણમાં જંગલ સફારીની ૮૦ ટકા કામગીરી વનવિભાગે પૂર્ણ કરી દીધી છે.
