ગાંધીનગર: શહેરના સેક્ટર-21માં સદસ્ય નિવાસ આવેલું છે, જ્યાં રાજ્યના તમામ ધારાસભ્યોને રહેવા માટે મકાન ફાળવવામાં આવતા હોય છે, ત્યારે ઠાસરાના કોંગ્રેસના ધારાસભ્યના નિવાસસ્થાનમા રહેતાં 42 વર્ષીય ભાણીયાએ ગળાફાંસો ખાઇ લીધો હતો.
આ બનાવની જાણ સેક્ટર 21 પોલીસ સ્ટેશને થતા પોલીસે ઘટના સ્થળે પહોંચીને આગળની કાર્યવાહી હાથ ધરી હતી. મળતી માહિતી મુજબ સેક્ટર-21 સદસ્ય નિવાસમાં 12/10 નંબરનું મકાન ઠાસરાનાં કોંગી ધારાસભ્ય કાંતિભાઈ પરમારને ફાળવવામાં આવ્યું છે, ત્યારે આ મકાનમાં તેમનો 42 વર્ષીય ભાણિયો રાકેશસિંહ હઠીસિંહ ચાવડા તેના પરિવાર સાથે રહેતો હતો.
રાકેશસિંહ છેલ્લાં કેટલાંક સમયથી પેરાલીસીસની બીમારીથી પણ પીડાતા હતા. જ્યારે ગતરાત્રે સદસ્ય નિવાસના મકાનમાં જ ગળાફાંસો ખાઇ લીધો હતો. જ્યારે સેક્ટર-21 પોલીસ મથકે બનાવની જાણ થતાં મૃતકને ગાંધીનગર સિવિલ હોસ્પિટલમાં પીએમ માટે મોકલી આપ્યો હતો.
