ડાંગ જિલ્લામાં ફીટ ઇન્ડિયા મુવમેન્ટ કાર્યક્રમ યોજાયો

ડાંગ : સમગ્ર દેશભરમાં આજરોજ રાષ્ટ્રીય ખેલ દિવસ તરીકે ભારત સરકાર દ્વારા ફિટ ઇન્ડીયા મુવમેન્ટ ઉજવણીના ભાગરૂપે વિવિધ રમત-ગમત સ્પર્ધાઓનું આયોજન યુવા સાંસ્કૃતિક વિભાગ અને જિલ્લા વહીવટી તંત્ર દ્વારા કરવામાં આવ્યું હતું. આહવા, વઘઇ, સુબીર, સાપુતારા અને શિવારીમાળ ખાતે ફિટ ઇન્ડીયા મુવમેન્ટ અંતર્ગત વિવિધ રમતોમાં કુલ 59,195 વિદ્યાર્થીઓ સહિત અધિકારી અને કર્મચારીઓએ ભાગ લીધો હતો.

ભારત સરકાર દ્વારા ફિટ ઇન્ડીયા મુવમેન્ટ ઉજવણીના ભાગરૂપે જિલ્લા કલેકટર એન.કે.ડામોરના માર્ગદર્શન હેઠળ સમગ્ર ડાંગ જિલ્લામાં આહવા,વઘઇ,સુબીર,સાપુતારા, શિવારીમાળ ખાતે ફિટ ઇન્ડીયા મૂવમેન્ટ અંતર્ગત વિવિધ રમતો જેવી કે સાઇકલ રેલી,દોડ,તીરંદાજી, ગોળા ફેંક, કબડી, ખો-ખો, વોલીબોલ જેવી સ્પર્ધાઓ યોજાઈ હતી.સવારે 8 થી 9 કલાકે શાળાઓના વિદ્યાર્થીઓએ રેલી દ્વારા ફિટ ઇન્ડીયા મુવમેન્ટનો મેસેજ આપ્યો હતો.જિલ્લા મથક આહવા ખાતે સવારે 9 થી 10 કલાક દરમિયાન સરકારી વિજ્ઞાન કોલેજ તેમજ વિનિયન અને વાણિજ્ય કોલેજના વિદ્યાર્થીઓએ દોડમાં ભાગ લીધો હતો.

સરકારી માધ્યમિક શાળાના બાળકોએ ખો-ખો અને કબડી, તેમજ સાઈકલ રેલી યોજી હતી.જિલ્લા રમત-ગમત કચેરીના પટાંગણમાં નહેરુ યુવા કેન્દ્રના યુવાનોએ વોલીબોલની સ્પર્ધા યોજી હતી. ત્યારબાદ ડાંગ સ્વરાજ આશ્રમ આહવા ખાતે જિલ્લા કક્ષાના કાર્યક્રમમાં તીરંદાજી, ગોળાફેંક, રસ્સા ખેંચ સ્પર્ધાઓ યોજાઈ હતી. જેમાં અધિકારી અને કર્મચારીઓએ પણ ભાગ લીધો હતો

આ કાર્યક્રમ જિલ્લા કલેક્ટરશ્રી એન.કે.ડામોરના અધ્યક્ષ સ્થાને યોજાયો હતો. સરકારી ખેતીવાડી માધ્યમિક શાળા, વઘઇ, તેમજ નવજ્યોત હાઈસ્કૂલ સુબીર ખાતે મામલતદાર અને તાલુકા વિકાસ અધિકારીઓના અધ્યક્ષપદ હેઠળ ફિટ ઇન્ડીયા મુવમેન્ટ અંતર્ગત સમગ્ર કાર્યક્રમો યોજાયા હતા.

સાપુતારા ખાતે સિનિયર કોચના માર્ગદર્શન હેઠળ સમગ્ર સ્પર્ધાઓ યોજવામાં આવી હતી.શિવારીમાળ ખાતે દિવ્યાંગ રમતવીરોએ પણ ફિટ ઇન્ડીયા કાર્યક્રમમાં ભાગ લઈ વિદ્યાર્થીઓના ઉત્સાહમાં વધારો કર્યો હતો. રમતોના અંતે માનનીય વડાપ્રધાન શ્રી નરેન્દ્રભાઇ મોદીના વક્તવ્યનું લાઈવ પ્રસારણ સૌએ નિહાળી દેશના લોકોમાં તંદુરસ્તી જળવાઈ રહે અને સૌ નિરોગી રહે તેમજ ફિટનેશ જાળવી રાખી મજબુત ભારત બનાવવાનો સંકલ્પ લીધો હતો.

જિલ્લા વિકાસ અધિકારીશ્રી એચ.કે.વઢવાણીયા, નિવાસી નાયબ કલેક્ટરશ્રી, ટી.કે.ડામોર, પ્રાંત અધિકારી કાજલ ગામીત, જિલ્લા શિક્ષણ અધિકારી શ્રી એમ.સી.ભૂસારા, જિલ્લા પ્રાથમિક શિક્ષણ અધિકારી શ્રી સેસ.એલ.પવાર, નાયબ પોલીસ અધિક્ષક, ડાંગ સ્વરાજ આશ્રમના ગાંડાભાઈ પટેલ, સિનિયર સીટીઝન સહિત શાળા પરિવાર તેમજ જિલ્લાની તમામ પ્રાથમિક/માધ્યમિક/ ઉચ્ચતર માધ્યમિક શાળા, કોલેજના કુલ 59,195 વિદ્યાર્થીઓએ ભાગ લઈ કાર્યક્રમને સફળ બનાવ્યો હતો.