ડાંગઃ જિલ્લાની આહવા પોલીસની ટીમે આહવા નગરમાં વરલી મટકા જુગાર રમાડતા એક ઇસમની ધરપકડ કરી કાયદેસરની કાર્યવાહી હાથ ધરી છે. પ્રાપ્ત વિગતો અનુસાર ડાંગ જિલ્લા પોલીસ વડા રવિરાજસિંહ જાડેજા અને નાયબ પોલીસ અધિક્ષક જે. આઈ. વસાવાનાં માર્ગદર્શન હેઠળ ગુરુવારના રોજ આહવા પોલીસ મથકના PSI પી. એમ. જુડાલ સહિત પોલીસ ટીમે આહવા નગરમાં સઘન પેટ્રોલીંગ હાથ ધર્યુ હતુ.
પેટ્રોલીંગ દરમિયાન આહવા નગરનાં પેટ્રોલ પંપ પાસે આવેલી દીવાલની પાછળ હાર જીતનો પૈસા વડે જુગાર રમાડતો હોવાની બાતમી મળી હતી. આહવા PSI પી. એમ. જુડાલ સહિત પોલીસની ટીમે બાતમીવાળા સ્થળે રેડ કરતા દીવાલની આડમાં લીલા કલરની નેટ બાંધેલી જગ્યાએ એક ઇસમ મળી આવ્યો હતો.
રેડ દરમિયાન મળેલો મુદ્દામાલ
- અંક લખેલા કાગળો નંગ - 3
- અંક લખેલી ડાયરી નંગ -2
- રોકડ રકમ રૂપિયા - 1160
આહવા પોલીસની ટીમે સ્થળ પરથી કૈલાસભાઈ દશરથભાઈ ફોમરેની ઝડતી લઈ પૂછપરછ કરતા આ ઇસમ ગ્રાહકો પાસે વરલી મટકા હાર જીતનો પૈસા વડે જુગાર રમાડી રહ્યાનું માલુમ પડયુ હતુ. આહવા પોલીસની ટીમે આ વરલી મટકા જુગાર રમાડનારા ઇસમ પાસેથી અંક લખેલા કાગળો 3 નંગ, અંક લખેલી ડાયરી 2 નંગ તથા કુલ રોકડ રકમ 1160નો મુદ્દામાલ કબ્જે કર્યો હતો. આહવા પોલીસ દ્વારા વરલી મટકા જુગાર રમાડનારા ઇસમની ધરપકડ કરી વધુ તપાસ હાથ ધરતા અસામાજિક તત્વોમાં ફફડાટ ફેલાઈ જવા પામ્યો છે.
