દમણ નગરપાલિકાએ ગટરની લાઈનો એક સાથે જોડી દેતા ગંદકી ફેલાઈ, સ્થાનિકોએ વિરોધ નોંધાવ્યો

દમણ: દમણમાં વરસાદી પાણીની લાઈન સાથે હોટલ માલિકોએ અને રહેણાંક વિસ્તારના લોકોએ પોતાના શૌચાલયો અને  કિચનની લાઈન જોઈન્ટ કરી દીધી હતી. જેના લીધે ફેલાયેલી ગંદકીને દૂર કરવા નગરપાલિકાએ વરસાદી પાણી સાથે જોડાયેલી બધી લાઈનો બંધ કરી દીધી હતી. આથી રહેવાસીઓને મુશ્કેલી પડતા તેઓ દમણ નગરપાલિકા ખાતે મોરચા સ્વરૂપે પહોંચ્યા હતા અને પોતાનો આક્રોશ ઠાલવ્યો હતો.

દમણની વરસાદી પાણીની લાઈનમાં ગંદકી ફેલાવવા બદલ દમણ નગરપાલિકાએ હોટલો સહીત અનેક કાંઠા વિસ્તારના ઘરોને પણ સપાટામાં લીધા હતા. દમણ દરિયા કાંઠા નજીક માછીવાડ વિસ્તારના કેટલાક ઘર માલિકોએ પણ હોટેલોની જેમ પોતાના કિચન અને શૌચાલયોના ગંદા પાણીની લાઈન પાલિકાની સ્ટોર્મ વોટર ડ્રેનેજની લાઈન સાથે જોડી દીધી હતી.

આ ગંદુ પાણી ટ્રીટ થયા વગર ડ્રેનેજ લાઈનમાં થઈને સીધુ દરિયામાં ભળી જતુ હોવાથી, ત્યારે પાલિકા દ્વારા હોટલ સંચાલકો સાથે માછીવાડ વિસ્તારમાં નાખવામાં આવેલી ગટરો અચાનક બંધ કરી દેતા માછીસમાજની મહીલાઓએ નગરપાલિકા કચેરીમાં મોરચો માંડ્યો હતો અને તાત્કાલિક બંધ કરેલી ગટરો ખુલ્લી કરવાની માંગ સાથે નગરપાલિકા સમક્ષ પોતાનો રોષ વ્યક્ત કર્યો હતો.ત્યારે નગરપાલિકા પ્રમુખ મુકેશ પટેલ અને CO વૈભવ રિખારીએ બંધ કરેલી ગટર લાઈનો સ્થળ નિરીક્ષણ કર્યા બાદ ખુલ્લી કરવામાં આવશે એવી હૈયા ધરપત આપીને મામલો થાળે પાડ્યો હતો અને મહિલાઓને પરત ઘરે મોકલી આપવામાં આવી હતી.