સેલવાસ: વડાપ્રધાન નરેન્દ્ર મોદી 25મી એપ્રિલે દાદરા નગર હવેલીના સેલવાસની મુલાકાતે આવશે. અહીં વડાપ્રધાન તેમના નામે બનેલ નમો મેડિકલ કોલેજ સહિત સંઘપ્રદેશ દાદરા નગર હવેલી અને દમણ દીવમાં કાર્યરત તેમજ પૂર્ણ થયેલા અંદાજિત 5 હજાર કરોડના વિકાસલક્ષી પ્રોજેકટનું લોકાર્પણ અને ખાતમુહૂર્ત કરશે.
તૈયારીઓને આખરી ઓપ: દાદરા નગર હવેલી અને દમણ દીવ માટે 25મી એપ્રિલનો દિવસ અનેરા ઉત્સાહનો દિવસ છે. આ દિવસે વડાપ્રધાન નરેન્દ્ર મોદી સેલવાસની મુલાકાતે પધારવાના છે. સેલવાસમાં નરેન્દ્ર મોદી નમો મેડિકલ રિસર્ચ સેન્ટરનું ઉદ્ઘાટન કરવાના છે. તેમજ અંદાજિત 50 હજાર જેટલા લોકોને સંબોધન કરવાના છે. જે માટે દાદરા નગર હવેલી પ્રશાસન દ્વારા તમામ તૈયારીઓને આખરી ઓપ અપાઈ રહ્યો છે. જે અંગે સેલવાસના ડેપ્યુટી કલેકટર ચાર્મી પારેખે મહત્વની વિગતો આપી હતી.
નમો મેડિકલ કોલેજનું કરશે ઉદ્ઘાટન: ડેપ્યુટી કલેકટર ચાર્મી પારેખે આપેલી વિગતો મુજબ PM મોદી 25મી એપ્રિલે 4 વાગ્યા આસપાસ હેલિકોપ્ટરથી સેલવાસ આવશે. અહીંના હેલિપેડ પર ઉતરી તેઓ સાયલીમાં તૈયાર થયેલ નમો મેડિકલ કોલેજનું ઉદ્ઘાટન કરશે. કોલેજની મુલાકાત લઈ તેમાં ઉપલબ્ધ સુવિધાઓની વિગતો મેળવશે. જે બાદ વડાપ્રધાન નજીકમાં તૈયાર કરેલ સભા મંડપ ખાતે જનમેદનીને સંબોધન કરશે.
જનસભાને કરશે સંબોધન: નરેન્દ્ર મોદીની જનસભા માટે તૈયાર કરેલ ડૉમમાં 65 હજાર ખુરશીઓ ગોઠવવામાં આવી છે. ગરમીને ધ્યાને રાખી પ્રશાસને વિશેષ વ્યવસ્થા કરી છે. પંખા, એરકુલર ઉપરાંત ફોગર્સની વ્યવસ્થા છે. સભા મંડપ આસપાસ 9 જેટલા પાર્કિંગ સ્થળો નક્કી કરવામાં આવ્યા છે. બસ, કાર, બાઇક સહિતના વાહનો ત્યાં પાર્ક થશે. ચાલીને આવનાર લોકો માટે ઇલેક્ટ્રિક બસની વ્યવસ્થા કરવામાં આવી છે. લોકો માટે પાણી, લીંબુ શરબત, ORS, ઉપરાંત ટોઇલેટની વ્યવસ્થા ઉભી કરવામાં આવી છે.
આ પણ વાંચો: NAMO Medical College: PM મોદી સેલવાસ ખાતે નમો મેડિકલ કોલેજનું કશે ઉદ્ઘાટન, જાણો વિદ્યાર્થીઓને શું થશે ફાયદો
96 પરિયોજનાઓનો શિલાન્યાસ, લોકાર્પણ: PM મોદી સેલવાસના સાયલી મેદાનમાં નમો મેડિકલના ઉદ્ઘાટન ઉપરાંત 4850 કરોડથી વધુના મૂલ્યની 96 પરિયોજનાઓનો શિલાન્યાસ કરશે અને તૈયાર પરિયોજનાઓ રાષ્ટ્રને લોકાર્પિત કરશે. આ પરિયોજનાઓમાં દાદરા અને નગર હવેલી જિલ્લાના મોરખલ, ખેરડી, સિંદોની અને મસાટ ખાતેની સરકારી શાળાઓ, દાદરા અને નગર હવેલીના વિવિધ રસ્તાઓનું સૌંદર્યકરણ, મજબૂતીકરણ અને પહોળા કરવાની કામગીરીનો સમાવેશ થાય છે.
આ પણ વાંચો: Chardham Yatra: કેદારનાથ ધામના કપાટ 25 એપ્રિલે ખુલશે, 23 ક્વિન્ટલ ફૂલોથી સુશોભિત કરાયું મંદિર
પોલીસનો કાફલો તૈનાત: PM મોદીની સુરક્ષાને લઈ વિશેષ તૈયારીઓ કરવામાં આવી છે. જેમાં સ્થાનિક પોલીસ પ્રશાસન ઉપરાંત નજીકના મહારાષ્ટ્ર, ગુજરાતમાંથી પોલીસ સ્ટાફ, કમાન્ડો સ્ટાફ, BSF જવાનો સહિતનો કાફલો તૈનાત કરવામાં આવ્યો છે. દાદરા નગર હવેલીમાં PM મોદીના સ્વાગત માટે પ્રશાસન ઉપરાંત ભાજપ પક્ષ અને સામાજિક સંસ્થાઓએ પણ વિશેષ તૈયારીઓ કરી છે. સેલવાસ શહેરમાં અને સાયલી માર્ગ પર PM મોદીના સ્વાગતના બેનર લગાડવામાં આવ્યા છે. રોશનીથી કોલેજ કેમ્પસ અને અન્ય ઇમારતને શણગારવામાં આવી છે.
