લોકડાઉન 3.0 : લવાછા-પીપરિયામાં વિફરેલા લોકોએ પોલીસ પર કર્યો પથ્થમારો, પોલીસે હાથ ધર્યું કોમ્બિંગ

સંઘપ્રદેશ દમણમાં ગુજરાતના કુંતા ગામના લોકોના હોબાળા બાદ ગુરુવારે દાદરા નગર હવેલીમાં ગુજરાતના લવાછાવાસીઓને પડી રહેલી તકલીફોને કારણે હોબાળો મચાવી પોલીસ પર પથ્થરમારો કર્યો હતો. લવાછા અને પીપરિયા ગામના વિફરેલા લોકોએ પોલીસ પર પથ્થરમારો કરતા કેટલાક પોલીસ જવાનો ઘાયલ થયા છે. જ્યારે પોલીસે તમામ વિસ્તારમાં કોમ્બિંગ હાથ ધરી 100 જેટલા લોકોની અટક કરી ચુસ્ત બંદોબસ્ત ગોઠવ્યો છે.

લવાછા : સંઘપ્રદેશ દાદરા નગર હવેલીમાં ભિલોસા અને સનાતન કંપનીના પરપ્રાંતીય કામદારોના હોબાળા બાદ ગુરુવારે ગુજરાતના લવાછા ગામે અને અડીને આવેલા પીપરિયા ગામે પણ લોકોએ આતંક મચાવ્યો હતો. જેમાં ડુંગરા પોલીસ પર અને સંઘપ્રદેશની પોલીસ પર લોકોએ પથ્થરમારો કરતા કેટલાક પોલીસ કર્મચારીઓ ઘાયલ થયા છે. આ હોબાળા અંગે મળતી વિગતો મુજબ દાદરા નગર હવેલીની હદમાં આવેલું ગુજરાતનું લવાછા ગામ લોકડાઉનમાં સિલ થઈ ગયું છે. આ અંગે લવાછા ગામના સરપંચે ખાસ લેટર ગૃહવિભાગમાં અને રાજ્ય સરકારમાં મોકલ્યો છે.

સરપંચે લેખિત પત્રમાં માગ કરી છે કે, લવાછા ગામના લોકોનો દાદરા નગર હવેલીમાં આરોગ્ય સેવા ઉપલબ્ધ કરાવવામાં આવે. ગામના સરપંચ અને ગામલોકોએ ગુજરાતમાં આવવા માટે ફક્ત દાદરા ગામના મુખ્ય રસ્તાનો ઉપયોગ કરવો પડે છે. લવાછા ગામના મોટાભાગના લોકો રોજીરોટી માટે દાદરા નગર હવેલીની કંપનીમાં તથા આરોગ્ય સેવા માટે પણ વિનોબા ભાવે હોસ્પિટલનો ઉપયોગ કરે છે. તો હાલમાં કોરોના વાઇરસને પગલે લવાછા ગામના લોકોને સંઘપ્રદેશમાં પ્રવેશ નહીં આપવામાં આવતો હોય જેના કારણે સરપંચ દ્વારા ગૃહ મંત્રાલયને પત્ર લખી દાદરા નગર હવેલીમાં લવાછા ગામના નાગરિકોને આરોગ્ય સેવા આપવાની માગ કરી હતી.

પત્ર

પત્ર

લવાછા ગામથી વલસાડ સિવિલ હોસ્પિટલ 40 કિલોમીટર અને વાપીની સરકારી તથા ખાનગી હોસ્પિટલ 18 કિલોમીટર દૂર છે. તો દાદરા નગર હવેલીની વિનોબા ભાવે સિવિલ હોસ્પિટલ ફક્ત 4થી 5 કિલોમીટરના અંતરે છે. જેથી લવાછા ગામના જરૂરિયાતમંદ લોકોને દાદરા નગર હવેલીના સેલવાસમાં આરોગ્ય સેવા માટે નજીક અને સરળ પડતું હોય તે અંગે તેમને પ્રવેશ આપવામાં આવે તેવી માગ પ્રબળ બની રહી છે. તે સાથે જ દાદરા નગર હવેલીમાં આવેલા વિવિધ ઔદ્યોગિક એકમોમાં અહીંના લોકો રોજગારી મેળવતા હોય લવાછા ગામને સીલ કરી દેતા ગામના મજૂરોએ હંગામો મચાવ્યો હતો. જેમાં પોલીસે વિવિધ વિસ્તારોમાં કોમ્બિંગ કરી 100 જેટલા ઇસમોની ધરપકડ કરી હાલ ચુસ્ત પોલીસ બંદોબસ્ત ખડકી દિધો છે.