દમણના જામપોર બીચ પર પ્રવાસીઓના ધસારામાં બીચ પર કેટલીક અસુવિધાઓને લઈને પ્રવાસીઓએ પોતાનો બળાપો કાઢ્યો હતો. તો, કેટલાક પ્રવાસીઓએ અહીં જરૂરી પાયાગત સુવિધાઓ માટે પોતાના સૂચનો આપ્યા હતા. જેમાં બીચ પર સ્વચ્છતાના ઉડતા ધજાગરા અંગે મહેસાણાના પ્રવાસી હિમાંશુ પંચાલે જણાવ્યું હતું કે, એક તરફ દેશમાં સ્વચ્છતા અભિયાન ચલાવાય છે. ત્યારે, અહીં દમણના દરિયા કિનારે સ્વચ્છતાના લીરા ઉડી રહ્યાં છે. પ્રવાસીઓના ધસારાને કારણે બીચ પર ગંદકી ફેલાઈ રહી છે. લોકોએ પણ જ્યાં ત્યાં કચરો કે પ્લાસ્ટિક ફેકવું જોઈએ નહીં.
સુરતના ઘોલવડથી આવેલા અયુબ મોહમ્મદ પટેલે જણાવ્યું હતું કે, બીચ પર મહિલાઓ જ્યારે દરિયામાં ન્હાવા જાય છે. ત્યારે, ભીના કપડાં બદલવાની કોઈ સુવિધા નથી. મહિલાઓ માટે વોશરૂમ કે ટોયલેટની પણ સારી સગવડ નથી. તેમની સાથે આવેલી મહિલા પ્રવાસીએ પણ મહિલા માટે યોગ્ય સુવિધા ન હોવાનું જણાવી મહિલા સુરક્ષાને ધ્યાને રાખી આ સગવડ ઉભી કરવી જોઈએ. બની શકે તો તે માટે નજીવા દરે જો સ્થાનિક સ્ટોલ ધારકો જ આ સેવા ઉભી કરે તો, તેને પણ વધારાની રોજગારી મળી શકે છે. એ સિવાય પ્રસાશને તો ખાસ મહિલાઓ માટે સુવિધાઓ ઉભી કરવી જોઈએ તેવું જણાવ્યું હતું.
આવું જ કઈંક અમદાવાદના રાજેશ પટેલે અને સુરતના મુશરફ એહમદ કારા નામના પ્રવાસીઓએ જણાવ્યું હતું કે, અહીં સ્ટોલની પાછળ જે પાર્કિંગ એરિયા છે. તેની આસપાસ સારું ગાર્ડન અને બેસવાની વ્યવસ્થા ઉભી કરવી જોઈએ. નજીકમાં રેસ્ટોરન્ટ હોવા જોઈએ તો દરિયામાં ન્હાવા આવતા પ્રવાસીઓ બે ઘડી આરામની પળો પણ માની શકે અને સ્વચ્છતા તો દરેક બીચ પર મહત્વની છે. અહીં તેનો પણ અભાવ જોવા મળે છે.
દમણના જામપોર બીચના વિકાસમાં હજુ ઘણી સુવિધાઓ ખૂટે છે. મહિલાઓ માટે જેમ જરૂરી સુવિધાઓ નથી. તેમ નાના મોટા તમામ વર્ગના પ્રવાસીઓ માટે પણ બેસવાની બેન્ચ, ગાર્ડન, શૌચાલય સહિતની સુવિધાઓનો અભાવ છે. જો આ સુવિધાઓ વહેલી તકે ઉભી નહીં થાય તો પ્રવાસીઓ માટે હોટ ડેસ્ટિનેશન બની રહેલો જામપોર બીચ લોસ્ટ ડેસ્ટિનેશનમાં ફેરવાઈ જશે.
