- છોટાઉદેપુર જિલ્લાના કેન્દ્રો પર વેકસિન ડ્રાય રન યોજાઇ
- જિલ્લા કલેક્ટર, જિલ્લા વિકાસ અધિકારી મોકડ્રીલમાં ઉપસ્થિત રહ્યાં
- એક દિવસમાં 100 લાભાર્થીઓને વેકસિન આપવામાં આવશે
છોટાઉદેપુરઃ ભારત સરકાર દ્વારા દેશમાં કોરોના વાયરસની બે રસીને મંજુરી આપવામાં આવી છે. સરકાર દ્વારા ટૂંક સમયમાં જ રસીકરણની પ્રક્રિયા હાથ ધરવામાં આવનાર છે. રસીકરણની તૈયારીના ભાગરૂપે છોટાઉદેપુર જિલ્લામાં પણ ડ્રાય રન એટલે મોકડ્રીલનું આયોજન કરવામાં આવ્યું હતું. આ ડ્રાય રન દરમિયાન આરોગ્ય વિભાગના દ્વારા કઇ રીતે રસી આપવી તે અંગે પ્રેકટિશ કરવામાં આવી હતી. આ ઉપરાંત રસીની જાળવણી, આઇસ બોકસમાં રસીને કઇ રીતે રાખવી,રસીકરણ માટે આવનાર લાભાર્થીઓના રજિસ્ટ્રેશન કરવાની કામગીરી તથા રસીકરણ બાદ લાભાર્થીઓને રાખવા માટેની વ્યવસ્થા સહિતની સગવડ અંગે વિગતે આયોજન અંગેની મોકડ્રીલ કરાઇ હતી.
- જિલ્લામાં અન્ય ત્રણ સ્થળે પણ યોજાઇ મોક ડ્રિલ
જિલ્લા કલેકટર સુજલ મયાત્રાએ પત્રકાર સાથે વાતચીત કરતા જણાવ્યું હતું કે, સરકારની સૂચના અનુસાર છોટાઉદેપુર જિલ્લામાં જનરલ હોસ્પિટલ સહિત અન્ય ત્રણ સ્થળે કોરોના વેકસિન માટેની ડ્રાયરનનું આયોજન કરવામાં આવ્યું હતું. વ્યવસ્થા ગોઠવવામાં આવી હોવાનું જણાવી તેમણે વેકસિન રૂમ, ઓબ્ઝર્વેશન રૂમ અને વેઇટિંગ રૂમની પણ વ્યવસ્થા કરવામાં આવી છે એવીી જ રીતે સુપેરે ચાલશે તો એક દિવસમાં 100 લાભાર્થીઓને વેકસિન આપવામાં આવશે એમ જણાવ્યું હતું.
- ડ્રાય રન વ્યવસ્થાઓનું નિરીક્ષણ કરતાં અધિકારીઓ
જિલ્લા કલેકટર વિકાસ અધિકારી મિહિરભાઇ પટેલ તેમજ જિલ્લા આરોગ્ય અધિકારી ડ્રાય રન રાઉન્ડ દરમિયાન જનરલ હોસ્પિટલની મુલાકાત લઇ વેકસિનેશન હોલ, ઓબ્ઝર્વેશન રૂમ, વેઇટિંગરૂમ સહિતની વ્યવસ્થાઓનું નિરક્ષણ કરી જરૂરી સૂચનાઓ આપી હતી. છોટાઉદેપુર જિલ્લાના છોટાઉદેપુર જનરલ હોસ્પિટલ, પાલસંડા પ્રાથમિક આરોગ્ય કેન્દ્ર , અર્બન હેલ્થ સેન્ટર છોટાઉદેપુર અને સામૂહિક આરોગ્ય કેન્દ્ર તેમજ ઝોઝ ખાતે ડ્રાય રન (મોકડ્રીલ) યોજવામાં આવી હતી.
