ભરૂચમાં બારે મેઘ ખાંગા થયા છે, અને બે દિવસથી ભારે વરસાદ વરસી રહ્યો છે. વાગરા તાલુકામાં મોટી દુર્ઘટના સર્જાઈ હતી. વાગરાના નાંદિડા ગામે રહેતા નરેન્દ્રસિંહ રાજ તેમની પત્ની અને ત્રણ બાળકીઓ સાથે સવારે ઘરમાં નાસ્તો કરી રહ્યા હતા. ત્યારે તેમની બાજુના કાચા મકાનની દીવાલ તેઓના મકાન પર ધરાશયી થઈ હતી. જેમાં તેઓના મકાનનો પણ કેટલોક ભાગ પડતા નાસ્તો કરી રહેલા માતા-પિતા અને ત્રણ દીકરીઓ દબાઈ ગયા હતા.
નાંદિડા ગામે દિવાલ ધરાશયી
ધડાકાભેર મકાનનો હિસ્સો તૂટી પડતા ગ્રામજનો દોડી આવ્યા હતા. જેમાં માતા-પિતાનો ચમત્કારિક બચાવ થયો હતો. જો કે, 7 વર્ષીય જિનલ, 5 વર્ષીય પીનલ અને 2 વર્ષીય ક્રિષ્ના નામની ત્રણ બહેનોના મોત નિપજ્યા હતા. ઇજાગ્રસ્ત માતાપિતાને સારવાર અર્થે સિવિલ હોસ્પિટલ ખસેડવામાં આવ્યા હતા. બનાવની તપાસ વાગરા પોલીસ ચલાવી રહી છે.
