જૂનાગઢ: ગિરનાર પર્વત પર આવેલા અંબાજી મંદિરના મહંતના વિવાદને લઈને હવે લડાઈ સાધુ સંતોની સાથે રાજકીય પાર્ટીમાં પણ પ્રસરે તેવી શક્યતા છે. પૂર્વ ડે. મેયર ગિરીશ કોટેચા પર ખૂબ જ ગંભીર આક્ષેપો લગાવીને તેમને કિન્નર અખાડામાં સામેલ કરવા જોઈએ તેવી આકરી પ્રતિક્રિયા આવી છે. હાલ જે લડાઈ ભવનાથના મહંત હરીગીરી અને કમંડળ કુંડના મહંત મહેશગીરી વચ્ચે ચાલી રહી છે. તેમાં આજે રાજકીય વ્યક્તિનો પણ પ્રવેશ થતા આ મામલો હવે રાજકીય બને તેવી પણ શક્યતાઓ છે.
અંબાજી મંદિરના મહંતના ગાદીપતિનો મામલો રાજકીય આંટીઘૂટીમાં પ્રવેશ્યો
પાછલા દસ દિવસથી જૂનાગઢમાં આવેલા ગિરનાર પર્વત પર સ્થાયી 51 શક્તિપીઠ પૈકી અંબાજી મંદિરના મહંત તનશુખગીરી બાપુના દેહ વિલય બાદ મામલો ભવનાથના મહંત હરિગીરી અને કમંડળ કુંડના મહંત મહેશગીરી વચ્ચે આક્ષેપ પ્રતિ આક્ષેપ ચાલી રહ્યો છે. તેવામાં આજે મહેશગીરી બાપુએ પત્રકાર પરિષદ યોજીને જૂનાગઢના પૂર્વ ડે. મેયર ગિરીશ કોટેચાને કિન્નર અખાડામાં સામેલ કરવા જોઈએ તેવી આકરી પ્રતિક્રિયા આપી છે. મહેશગીરી બાપુ દ્વારા ગિરીશ કોટેચાને લઈને જે પ્રતિક્રિયા આપવામાં આવી છે તેને લઈને હવે સમગ્ર મામલો હરીગીરી અને મહેશગીરીની સાથે હવે રાજકીય પક્ષ અને ગિરીશ કોટેચા વચ્ચે પણ શરૂ થઈ શકે છે.
ગિરીશ કોટેચાએ શું કહ્યું?
ગિરીશ કોટેચાનો ETV Bharat એ ટેલિફોનિક સંપર્ક કર્યો હતો. પરંતુ તે હાલ રાજકોટમાં ચાલી રહેલી રામકથામાં હાજર હોવાથી આગામી 30 તારીખે મહેશગીરી બાપુએ જે પ્રતિક્રિયા તેને લઈને તેઓ જૂનાગઢમાં ખુલાસો કરશે તેવો પ્રતિભાવ આપ્યો હતો.
અંબાજી મંદિરના મહંત તનસુખગીરી બાપુનો દેહ વિલય થયા બાદ મામલો હવે ખૂબ જ ચર્ચાસ્પદ બની રહ્યો છે. આજે પત્રકાર પરિષદના સમયે જૂનાગઢના ધારાસભ્ય સંજય કોરડીયા અને શહેર ભાજપ પ્રમુખ પુનિત શર્મા પણ મહેશ ગીરીબાપુ સાથે બેઠક કરવા માટે પહોંચ્યા હતા. આગામી દિવસોમાં જિલ્લા કલેક્ટર અને પોલીસ વિભાગ દ્વારા જે કોઈ પણ કાર્યવાહી થશે તેમાં તેમને સંતોષ છે તેવો પ્રતિભાવ પણ મહેશગીરી બાપુએ માધ્યમો સમક્ષ આપ્યો હતો.
અગાઉ તનસુખગીરી બાપુના પરિવારજનો દ્વારા પ્રેમગીરી બાપુની અંબાજી મંદિરના મહંત તરીકે નિમણૂકને અયોગ્ય ઠેરવવા માટે હરીગીરી બાપુ અને પ્રેમ ગીરી બાપુ વિરુદ્ધ જુનાગઢ એ ડિવિઝન પોલીસ મથકમાં અરજી પણ આપી છે. તેની વચ્ચે હવે પૂર્વ ડે. મેયર ગિરીશ કોટેચાનું સમગ્ર મામલામાં નામ આવતા આ મામલો હવે ધાર્મિક સાધુ-સંતોના વિવાદની સાથે રાજકીય પણ બની શકે છે.
આ પણ વાંચો:
