બનાસકાંઠાના દિયોદર રેલવે ફાટક પર ટ્રેનની અડફેટે આવતા યુવાન ઈજાગ્રસ્ત

બનાસકાંઠાઃ જિલ્લામાં છેલ્લા ઘણાં સમયથી ટ્રેનની અડફેટે આવતા અકસ્માતના બનાવમાં વધારો થઈ રહ્યો છે. ત્યારે આજે દિયોદર રેલવે ફાટક પાસે મજૂરી કામે જતો યુવક ટ્રેનની અડફેટે આવતા ગંભીર રીતે ઘવાયો હતો.

બનાસકાંઠાના દિયોદર તાલુકાના મીઠા ગામે રહેતા સુરેશ બારોટ મજૂરી કામ અર્થે જઈ રહ્યા હતા. તે દરમિયાન દિયોદર પાસેથી પસાર થતી ટ્રેનની અડફેટે આવી ગંભીર રીતે ઘાયલ થયેલો ફાટક પાસે જોવા મળ્યો હતો. આ ઘટનાની જાણ આજુબાજુના લોકોને થતા તાત્કાલિક રેલવે પોલીસને જાણ કરી હતી. રેલવે પોલીસ તુરંત ઘટનાસ્થળે આવી યુવકને 108 એમ્બ્યુલન્સ મારફતે સારવાર અર્થે દિયોદર રેફરલ હોસ્પિટલ ખાતે ખસેડ્યો હતો. આ ઘટનામાં યુવાનના હાથના અને ખભાના ભાગે ગંભીર ઇજા પહોંચી હતી અને હાલ સારવાર ચાલુ છે.