હાલમાં અંબાજી-દાંતા પંથકમાં પાણીનો પ્રશ્ર વિકટ બની રહ્યો છે. ત્યારે આ સમસ્યાને લઈને આદિવાસી લોકોને દુર-દુર જઈને પીવાના પાણીની વ્યવસ્થા કરવી પડે છે. સાથે જ ઢોરના હવાડા પણ ખાલીખમ પડ્યા છે. આ ઓછું હોય એમ દાંતા તાલુકાના મહત્તમ આદિવાસીને પછાત વિસ્તાર માનવામાં આવે છે. જ્યાં ખેડૂતો માત્ર ખેતી પર જ જીવનનિર્વાહ ચલાવે છે. ત્યારે ખેતીવાડીમાં ઉપયોગી થઈ શકે તેમજ પાણીના તળ ઉંચા આવે તે માટે અંબાજી-દાંતા પંથકમાં અનેક ચેકડેમો બનાવવામાં આવ્યા છે. આ ચેકડેમાની પરિસ્થિતિ જોતા ચેકડેમ બનાવવામાં આવ્યા છે, તે જાણે કે સરકારને લાંછન લગાડે છે તેવું કામ કર્યું છે.
આ ચેકડેમો લાખો રૂપિયાના ખર્ચમાં બનાવવામાં આવ્યા છે. જેમાં એક ઈંચ પણ પાણી રોકાઈ શકે તેવી પરિસ્થિતિમાં નથી. આ વિસ્તારની ભૌગોલિક પરિસ્થિતિના કારણે ચોમાસામાં પાણીનો ધસારો વધુ આવતા ભ્રષ્ટાચારથી બનેલા ચેકડેનો તુટી જતા હોય છે. જો કે આ બાબતને અંબાજી ગ્રામ પંચાયતના સેક્રેટરીએ પણ આ વાસ્તસિકતા સ્વીકારી છે. સાથે જ નાના-નાના ચેકડેમને બદલે એક મોટો ચેકડેમ બનાવવાની માગ પણ કરી હતી.
જો કે આ મામલે અંબાજીના સરપંચે પણ આ ચેકડેમ તકલાદી બનાવ્યા હોવાનું જણાવ્યું છે. અંબાજી-દાંતા પંથકમાં અનેક ચેકડેમો તો બનાવાયા છે. પરંતુ તેમાં મોટા ભાગના ખંડિત થઈ ગયા છે, જે ભ્રષ્ટાચાર થયા હોવાની ચાડી ખાય છે. આ સમસ્યાને લઈને હાલમાં ગુજરાત સરકારે રાજ્યભરમાં જળસંચય માટે યોજના લાગુ કરી છે. પરંતુ અંબાજી-દાંતાની ભૌગોલિક પરિસ્થિતિ ઢાળ-ઢોળાવવાળી હોવાના કારણએ પાણીનો સંગ્રહ થઈ શકે તેવી કોઈ જ વ્યવસ્થા કરવામાં આવી નથી.
ગબ્બર પાછળ આવેલી તેલીયા નદી પર મોટો ચેકડેમ બનાવવામાં આવે તો અંબાજી સહિત 40 ઉપરાંતના ગામડાઓને પાણીની સાથે આ વિસ્તારમાં પ્રવાસન ધામ તરીકે પણ વિકસિત થઈ શકે તેમ છે.
