બનાસકાંઠાઃ જિલ્લામાં આવેલા પ્રસિદ્ધ બાલારામ મહાદેવના મંદિરે રવિવારે અને સોમવારે દર્શનાર્થીઓ પર પ્રતિબંધ ફરમાવ્યો છે. કોરોના સંક્રમણને વધતો અટકાવવા માટે બાલારામ મંદિર ટ્રસ્ટ સંચાલક મંડળે આ નીર્ણય લીધો છે.
હિન્દૂ ધર્મના પવિત્ર ગણાતા શ્રાવણ માસમાં ભક્તો દ્વારા એક મહિના સુધી ભગવાન ભોળાનાથની ભક્તિમાં લીન થઈ પૂજા-અર્ચના કરવામાં આવે છે, પરંતુ ચાલુ વર્ષે કોરોના વાઇરસની મહામારીના કારણે તમામ શિવાલયોમાં પૂજારી દ્વારા જ પૂજા-અર્ચના કરવામાં આવી રહી છે.
જિલ્લામાં એક તરફ કોરોના સંક્રમણના દર્દીઓની સંખ્યા સતત વધી રહી છે, ત્યારે બીજી તરફ શ્રાવણ મહિનાની શરૂઆત સાથે જ શિવાલયોમાં પણ દર્શનાર્થીઓની ભારે ભીડ ઉમટી રહી છે, જેથી બનાસકાંઠામાં સુપ્રસિદ્ધ બાલારામ મહાદેવના મંદિરે દર્શનાર્થીઓ પર પ્રતિબંધ ફરમાવ્યો છે. કોરોનાના સંક્રમણને અટકાવવા માટે બાલારામ મંદિર ટ્રસ્ટ સંચાલક મંડળ દ્વારા આ નિર્ણય લેવાયો છે.
મંદિરને અત્યાર સુધી માસ્ક પહેરી અને સોશિયલ ડિસ્ટન્સ રાખી દર્શન માટે ખુલ્લું રાખવામાં આવ્યું હતું, પરંતુ દિવસે ને દિવસે દર્શનાર્થીઓની ભીડ વધતા આખરે સંચાલક મંડળે આ નિર્ણય લેવો પડ્યો છે. આ સિવાય રવિવારે અને સોમવારે ખાસ મેળો ભરાતો હોય છે અને માત્ર બનાસકાંઠા જિલ્લા જ નહીં પરંતુ 200 -200 કિલોમીટર દૂરથી પણ લોકો અહીં દર્શનાર્થે આવતા હોય છે, જેના કારણે વધી રહેલા ટ્રાફિકને અટકાવવા અને કોરોના વાઇરસના સંક્રમણથી લોકોને બચાવવા માટે આ નિર્ણય લેવાયો છે. બાલારામ મંદિર પાસેથી પસાર થતી નદીમાં દશામાની મૂર્તિઓ પધરાવવા પર પણ પ્રતિબંધ ફરમાવ્યો છે.
