બનાસકાંઠા : ગુજરાત રાજસ્થાન બોર્ડર પર આવેલા અમીરગઢના જોરાપુરા ગામે હદય કંપાવી દે તેવી ઘટના સામે આવી છે. જેમાં આ ગામમાં રહેતા દશરથ ઠાકોર તેની પત્ની અને બાળકોને લેવા માટે તેની સાસરી જોરાપુરા ગામે આવ્યો હતો, પરંતુ પારિવારિક અણબનાવના કારણે પત્નીએ તેના પતિ સાથે જવાની ના પાડી હતી.
આ સમગ્ર પારિવારીક ઝઘડા વચ્ચે રોષે ભરાયેલા પતિએ પત્ની સાથે બદલો લેવા માટે કાવતરું રચ્યું હતું. જે મુજબ પતિએ મોડી રાત્રે તેના ઘરે આવી અને ખેતરમાં રહેલા 6 પશુઓને રોટલા સાથે ઝેરી પદાર્થ ખવડાવી મોતને ઘાટ ઉતારવાની કોશિશ કરી હતી. જો કે તે સમયે તેના સસરાને જાણ થતાં જ તેઓ દોડી આવતા જમાઈ ત્યાંથી નાસી ગયો હતો. જ્યારે કણસતા પશુઓ જોઈ દેશી સારવાર કરી 4 પશુઓને બચાવી લેવાયા હતા. જ્યારે 2 પશુઓના મોત નિપજ્યા હતા.
આ સમગ્ર ઘટના મામલે સસરાએ જમાઈ વિરુદ્ધ પોલીસ ફરિયાદ નોંધાવી છે. માનસિક વિકૃતિ ધરાવતા જમાઈ દશરથના આ કૃત્યથી ગ્રામજનો પણ રોષે ભરાયા હતા અને પશુઓને મોતને ઘાટ ઉતારનાર દશરથને પકડી કડક કાર્યવાહી કરે તેવી માગ કરી રહ્યા છે.
