- ડીસા-પાલનપુર નેશનલ હાઇવે પર 4 વાહનો વચ્ચે અકસ્માત
- 2 ટ્રક વચ્ચે રીક્ષા ફસાઈ જતા 3 લોકો જીવતા ભૂંજાયા, કુલ 4ના મોત
- ડીસા મામલતદાર, તાલુકા પોલીસ, એમ્બ્યુલન્સ, ફાયર ફાઇટરની ટીમે રાહત કામગીરી કરી
ડીસા: બનાસકાંઠા (Banaskantha)માં ડીસા-પાલનપુર હાઈવે (Deesa-Palanpur Highway) પર ભોયણ ગામના પાટિયા પાસે આજે સવારે 4 વાહનો વચ્ચે થયેલા વિચિત્ર અકસ્માત (Accident)માં 3 વાહનો સળગી જતાં 2 ટ્રક વચ્ચે ફસાયેલી રીક્ષા ભડથું થઈ ગઈ હતી. આ અકસ્માતમાં રીક્ષામાં બેઠેલા 3 મુસાફરો જીવતા ભૂંજાઈ ગયા હતા,જ્યારે એકનું સારવાર દરમિયાન મોત થતા કુલ 4 લોકોના મોત થયા હતા.
બનાસકાંઠા જિલ્લામાં અકસ્માતની સંખ્યામાં વધારો
બનાસકાંઠા જિલ્લામાં માર્ગ અકસ્માતના બનાવમાં સતત ચિંતાજનક વધારો થઈ રહ્યો છે. છેલ્લા એક અઠવાડિયામાં બનાસકાંઠા જિલ્લામાં અનેક રસ્તાઓ લોહિયાળ બન્યાં છે. અત્યાર સુધી સર્જાયેલા નાના-મોટા અકસ્માતોમાં અનેક માસૂમ જિંદગીઓ મોતને ભેટી છે. ખાસ કરીને નેશનલ હાઈવે પર વારંવાર મોટા હેવી વાહનોના ગભલત ભર્યા ડ્રાઇવિંગના કારણે મોટા અકસ્માતો સર્જાય છે, જેમાં અનેક લોકો ઈજાગ્રસ્ત થાય છે અને મોતને પણ ભેટે છે, ત્યારે વારંવાર સર્જાતા અકસ્માતને લઈ હવે લોકોમાં પણ ભયનો માહોલ જોવા મળી રહ્યો છે.
ડીસા પાલનપુર નેશનલ હાઈ-વે પર અકસ્માત
ડીસા પાલનપુર હાઈવે પર ભોયણ ગામના પાટિયા પાસે આજે સવારે વિચિત્ર અકસ્માત સર્જાયો હતો, જેમાં ભોયણ ગામના પાટિયા પાસે હાઈવે પર ડીવાઈડર વચ્ચે પડેલા કટમાં એક ટ્રક વળાંક લેવા જતા તેની સાઈડમાં રીક્ષા પણ ઊભી રહી ગઈ હતી. આ સમયે પાલનપુર તરફથી પથ્થર ભરીને આવતા ટ્રેલરે બન્ને વાહનોને અડફેટે લેતા 2 વાહનો વચ્ચે રિક્ષા ચગદાઈ જવા પામી હતી, જ્યારે ડીસાથી પાલનપુર તરફ જતી ઇકો વાન પણ ટ્રકને ધડાકાભેર અથડાઈ હતી. આમ 4 વાહનોનો અકસ્માત થયો હતો. આ અકસ્માત એટલો ભયંકર હતો કે વાહનો બળીને ખાખ થઇ ગયા હતા, જ્યારે ઇકો ગાડીને ટક્કર લાગતા તે સાઈડમાં ઉતરી ગઈ હતી.
ઘાયલોને ભણસાલી હોસ્પિટલમાં સારવાર માટે ખસેડાયા
આ અકસ્માતમાં 4 લોકોના કરૂણ મોત નિપજ્યા હતા, જ્યારે 5થી વધુ લોકોને ગંભીર ઈજાઓ થતા સારવાર અર્થે ડીસાની ભણસાલી હોસ્પિટલ ખાતે ખસેડવામાં આવ્યા હતા. અકસ્માતના પગલે ઘટનાસ્થળે લોકોના ટોળેટોળા ઉમટી પડ્યા હતા.
આગમાં 4 વાહનો બળીને ખાખ
જો કે બંને ટ્રક વચ્ચે ફસાયેલી રીક્ષામાં અચાનક આગ લાગતા ટ્રક, ટ્રેલર અને રીક્ષા ભડભડ સળગવા લાગ્યા હતા. આગ એટલી તીવ્ર હતી કે ધુમાડાના ગોટેગોટા 3થી 4 કિલોમીટર દૂર સુધી દેખાવા લાગ્યા હતા. રિક્ષામાં મુસાફરો બેઠેલા હતા, જેઓ બહાર ન નીકળી શકવાને કારણે અફડાતફડી સર્જાઇ હતી. ત્યારબાદ સ્થાનિક લોકો દ્વારા આ અંગેની જાણ ડીસા અને પાલનપુર નગરપાલિકાના ફાયર વિભાગને કરાતા બન્ને ફાયર ફાયટરો તાત્કાલિક ઘટનાસ્થળે પહોંચ્યા હતા અને આગને કાબૂમાં લેવાનો પ્રયત્ન શરુ કર્યો હતો, પરંતુ આગ એટલી વિકરાળ હતી કે કલાકો સુધી તેના પર પાણીનો મારો ચલાવવામાં આવ્યો હોવા છતાં પણ આગ કાબુમાં આવી ન હતી. ત્યારબાદ પાલનપુરથી અન્ય ફાયર ફાઈટર આવતા કલાકની ભારે જહેમત બાદ આગને કાબુમાં લેવામાં આવી હતી.
વહીવટી તંત્ર ઘટનાસ્થળે
ડીસાના ભોયણ ગામ પાસે આજે બનેલી ગોઝારી ઘટનાના પગલે ડીસા તાલુક પોલીસ, મામલતદાર સહિત અધિકારીઓ ઘટનાસ્થળે દોડી આવ્યા હતા. ફાયર ફાઈટરે આગ ઉપર કાબૂ મેળવતાં તેમજ ક્રેન દ્વારા ટ્રક, ટ્રેલર ખસેડાતા રિક્ષામાં બેઠેલા 3 મુસાફરો જીવતા ભૂંજાયા હોવાનું જણાવ્યું હતું. જ્યારે ઇકો વાનમાં સવાર મુસાફરો પૈકી એક મુસાફરનું ડીસા ભણશાલી હોસ્પિટલમાં સારવાર દરમિયાન મોત નીપજ્યું હતું.
આ પણ વાંચો: Epidemic: બનાસકાંઠા જિલ્લામાં ઋતુગત રોગચાળાનું પ્રમાણ વધ્યું, આરોગ્યતંત્ર સળવળ્યું
આ પણ વાંચો: બનાસકાંઠા જિલ્લામાં Groundnut Prices Rise, ટેકાના ભાવ કરતાં વધુ ભાવ
